Asteartean egin zuen azaroko ohiko plenoa, Hernaniko Udalak. Mozioak izan ziren protagonista, eta denak onartu ziren; aho batez hiru, eta EAJren eta PSE-EEren abstentzioarekin Koordinadora Feministarena.
Baina mozioen aurretik, beste zenbait gai landu zituzten. Aurreko hiru plenoen aktak onartu ondoren, azaroko dekretuen berri eman zuten, eta segidan, kontuhartzailearen txostenekin sortu zen eztabaida. Hiru hiruhileko beteta, aurrekontuaren exekuzio maila zenbatekoa den azaldu zuen Isa Sanchez ogasun zinegotziak: gastu guztien %66a gauzatu da, eta sarreren %87a; Zerbitzu Sozialetan %81ekoa da gastu eta sarreren exekuzio maila; eta Ereñotzun %65ean daude gastuak eta %36an sarrerak.
Inbertsioei dagokienez, %22a exekutatu du Udalak, eta %48a baimendu. Kopuru horiek oso bajuak direla kritikatu zuen PSE-EEko Ricardo Crespok, eta «normala bilakatzen» ari dela gaineratu zuen Orain Hernaniko Jaione Aristregik; «ez da aurtengo kontua bakarrik». Luis Intxauspe alkateak erantzun zien, hirigintzakoak eta zerbitzuen sailekoak izaten direla gehienak: «hirigintzan, lehiaketa batzuk hutsik geratu zaizkigu, enpresek obra haundietara jotzen dutelako; eta zerbitzuetan, baja arazoak izan ditugu, baita ezustekoak ere (Lastaolako zubia erori izana, adibidez), sailaren martxa atzeratu dutenak». Gaia batzordean lantzekotan geratu ziren.
Ondoren, aho batez onartu zuten kreditu txertaketa bat egitea, Zerbitzu Sozialen aurrekontuan, «etxez etxeko zerbitzuak daukan eskaerari erantzuteko», Xabi Lertxundi zinegotziak azaldu zuenez.
Eta mozioen aurretik, Hernani Erabaki prozesuari buruz aritu ziren: «aurten saiakera egin dugu gazteen partehartzea bultzatzeko, eskoletan; Txirritan, Inmakuladan eta Institutuan landu dugu bereziki», azaldu zuen Intxauspek. 2019ko prozesuaz baino, 2018 eta 2017 urteetako prozesuez hitz egin nahi izan zuen Crespok: «ulertu daiteke, hein batean, 2018ko proposamen batzuk baimendu gabe egotea, baina ez 2017koak exekutatu gabe egotea». Koro Etxeberria kultura eta euskera zinegotziak erantzun zion, zerbitzuen sailetik bideratu beharrekoak direla proposamen gehienak, martxa motelduz.
Lau mozioak, onartuta
Mozioen txandan, The Other Jerusalem izenekoa onartu zuten aurrenik, aho batez, salatzeko Israelek palestinarren giza eskubideak bortxatzen dituela, eta bat egiteko izen hori duen kanpainarekin. Aho batez onartu zuten, baita ere, bigarrena: «Galarreta eremua garatzeko, erakundeen arteko elkarlanerako deia egin nahi dugu, bakoitzak bere baliabideekin, industriak, bestelako guneak, bideak, espaloiak... egiteko», azaldu zuen alkateak. EAJko Andoni Amonarraizek adierazi zuen, oso garrantzitsua dela eremu hori garatzea, eta kritikatu zuen orain arte oso interes gutxi jarri zaiola.
Azaroaren 25aren bueltakoak izan ziren azkeneko biak. Koordinadora Feministak salatu zuen «justiziaren patriarkaltasuna», eta Udalari eskatu zion indarkeria matxistarekin lotutako baliabideak denon eskura jarri eta doakoak izatea. Abstenitu egin ziren EAJ eta PSE-EE, ideia orokorrarekin bat etorri arren, aipatutako kontu batzuekin ez zeudelako ados.
Eta Orain Hernanik, beste mozioan, eskatu zuen neurriak hartzea, adineko emakumeak babesteko indarkeria matxistaren modu guztietatik, eta haien errealitatea ikusarazteko: «44 urtetik gorakoak dira biktimen %31, eta aldiz, salaketa gutxien jartzen dituztenak. Beraiek dira, gainera, genero desberdintasuna gehien pairatu dutenak, hamarkadatan», adierazi zuten. Aho batez onartu zen testua.