Asteburu ona izan da pasa dena, Hernaniko pelotarientzat, bai eskuz eta bai palaz. Kanporaketa garrantzitsuak zeuzkaten jokoan, eta hiru torneotako finaletara sailkatu dira.
Palaz, Munduko Pilota Batzarrak antolatuta, kinieletako txapelketan ari dira Amaia Irazustabarrena eta Maider Huizi. Asteburuan irabazita, azkeneko kinieletako finalerako sailkatu da Irazustabarrena; eta tanteoari esker, azkeneko kinieletan izango da Huizi ere.
Irazustabarrenak berak, Emakumea Pilotari txapelketaren finala ere jokatuko du, Arrillagarekin batera aurreneko postuan bukatu baitu ligaxka. Gainerakoek, larunbat honetan jokatuko dituzte semifinalak, Hernanin, eta bertan ariko da Eider Otaegi, Aranbururekin batera. Finalak abenduaren 15ean izango dira, Tolosan.
Jarak eta Salaberriak irabazi, Baztango Torneoan
Esku pelotariek, berriz, hiru zita nagusi zeuzkaten asteburuan. Batetik, Gipuzkoako Txapelketan, aurreneko kanporaketa irabazi zuen Oier Azpeitia alebinak, Zumaiaren kontra (8-3 eta 8-2).
Bestetik, semifinalak jokatu zituzten Baztango Torneoan. Irabazi egin zion Jon Jara kadeteak, Eskuza bizkaitarrarekin, Oiarperi (18-13); eta Xabier Salaberria jubenilak, Agirre nafarrarekin, Paz Zigandari (18-7). Finalerako txartelik gabe geratu zen Unax Uitzi kadetea, 17-18 galduta. Abenduaren 9an jokatuko dituzte finalak.