2019 urterako Udal Aurrekontu proposamena aztertu ondoren, «osoko zuzenketa» aurkeztu duela adierazi du Hernaniko EAJ-PNVk, eta «proposamenaren kontra» bozkatuko duela.
«Aurten, osoko zuzenketa hau edo zuzenketa partzialak aurkeztuko ote genituen erabaki aurretik, alkatearekin eta hondakinen gaiaren ordezkariarekin hitz egin dugu, planteatzeko posible ote zen lan egitea, gehien aldentzen gaituzten bi gaien inguruan: atez atekoa batetik; eta bestetik, egotea lehenengo mailako zinegotziak, EH Bildukoak, eta bigarren mailakoak, oposiziokoak, dagoeneko epaitegietara eraman dugun gaia. Baina esan ziguten, bi gai horietan ez dela posible negoziaketa. Urtero bezala, ikusi dugu EH Bilduk politika egiteko moduak, ez digula aukerarik ematen akordioak lortzen saiatzeko», azaldu du Andoni Amonarraizek, EAJren bozeramaileak.
Hori horrela, osoko zuzenketa aurkeztu du alderdiak, eta bi horiez gain, beste hainbat gairen inguruan ere azaldu desadostasuna.
EAJk kritikatu du, batetik, aukeraketa libreko langileentzat beste 103.061,54 euroko partida jasotzea; zuzeneko erosketen sistema berdin mantendu eta Hernaniko enpresen arteko errotazioa ez ezarri izana, EAJk proposatu bezala; Tiloseta eta Plaza berritzeko partidarik ez jaso izana; eta kooperaziorako diruaren %25a ez bideratzea, zuzenean, Angel Olarani eta munduan zehar proiektuak gidatzen dituzten hernaniarrei. «Gainera, aurten dirudienez ez da Udal Gobernuko inor joango Wukrora, 2018an alkateak, bi zinegotzik eta bi teknikarik egin bezala, 8.056,65 euroko kostuarekin, dirulaguntza hori murriztu egin dute, 12.000 eurotik 3.000 eurora», gaitzetsi du Amonarraizek.
Inbertsioen partida, beste zeregin batzuetarako
Komertzio berriak sustatzeko partidarik ez egotea ere kritikatu du, eta adierazi du, beraiek beste modu batera bideratuko luketela inbertsioetarako partida: «1.198.530 euro bideratuko dira Galarreta inguruneko azpiegituretara, eta 1.577.699 euro, Volvo eta Bereziartuako zonaldeak garatzera. Uste dugu, diru hori bideratu beharko litzatekeela Parke Teknologikoarekin akordioa lortzera, Oronako ingurunea bultzatzeko eraikinak egiteko; eta Sprilurrekin beste akordio bat lortzera, Estubegiko zonaldea garatzeko», azaldu du Amonarraizek.
Zarataren inguruan, Udaltzaingoarentzat protokolo bat ere eskatu du, eta kritikatu du berriro haunditzea dirulaguntza Udalbiltzari (45.000 eurotik 50.000 eurora).
Azaldu du, baita ere, 43.000 euro haunditu dela herritarren partehartzerako partida: «baina aurrena, ez litzateke azterketa bat egingo partehartzerako daukagun sistemaren inguruan? Harrobiaren prozesuan, 10 herritarrena izan zen batazbesteko partehartzea».
Hondakinen bilketarako, «errekor guztiak» hautsiko direla salatu du, 2.944.000 eurorekin; «2018an baino 156.000 euro gehiago. Bosgarren edukiontziarekin eta 2.000.000 euro inguruko kostuaz, antzeko emaitzak lortuko genituzke».
Eta azkenik, gaitzetsi du EH Bilduk «bigarren mailako langiletzat» dituela oposizioko kideak, batzorde eta plenoetako lana ordaindu gabe, eta Orain Hernani eta PSE-EEri liberaziorik eskaini gabe. EAJk dauka zinegotzi liberatu bat, baina legeak EH Bildu derrigortzen duelako bakarrik».