Gaur bilduko da Hernaniko Udaleko plenoa, azaroko ohiko deialdian; iluntzeko 19:00etan hasita, udaletxeko pleno aretoan. Hamar puntu dauzkate lantzeko, guztira.
Aurreko hiru plenoetako aktak onartu ondoren, berri emateen txanda iritsiko da. Aurrena, azaroan zehar emandako kredituen berri emango dute. Ondoren, kontuhartzaileen txostenak emango dituzte aditzera: 2018ko aurrekontuaren exekuzioari buruzkoa, finantza eta ikuskapen txostena, eta ingera oharrak.
Gero, Udaleko Zerbitzu Sozialen 2018ko aurrekontuari aldaketa bat egitea bozkatuko dute, kreditu gehigarri bat txertatzea proposatuz.
Eta segidan, Hernani Erabaki prozesuaren berri emango dute, behin zehaztuta zein proposamenetara bideratuko den aurtengo partida.
Baina gaurkoan, mozioak izango dira protagonista; lau landuko dituzte: The Other Jerusalem izenekoa; Galarreta eremua garatzeko erakundeen arteko elkarlanerako deia; mugimendu feministak azaroaren 25aren harira aurkeztutakoa; eta Orain Hernanirena, adineko emakumeak indarkeria matxistaren modu guztietatik babesteari eta horri lotutako prebentzioari buruzkoa.