Maiatzean bukatu zen Udalak, Elhuyar enpresaren bidez bideratu zuen hausnarketa prozesua, herriko kultur jardueraren ingurukoa, eta ondorioztatu zen, besteak beste, udala eta herritar zein kultur eragileen arteko harremana bultzatzeko eztabaida-gune edo kultur mahaia sortzeko beharra zegoela. Ostegunean egin zen kultur mahaiaren aurreneko bilera, eta urtean bitan bilduko da.
Azaroan eta maiatzean
Kultur teknikariak eta zinegotziak proposatuta, kultur mahaia urtean bitan biltzea adostu zen; azaroan eta maiatzean. Bilerak irekiak dira, eta edozein herritar edo eragilek hartu dezake parte.
Bilera hauetan urteko plana deifnitu eta adostuko da, eta landuko diren gaiak zein izango diren aukeratuko da.
Gaikako taldeak, sormena eta koordinazioa garatzeko
Hain zuzen, hausnarketa prozesuan ondorioztatutakoaren arabera, gai asko dago kultura arloan lantzeko, eta pixkanaka lantzea erabaki zen osteguneko bileran.
Aurtengorako bi proposatu dira: Ave Marian kokatuko den sormen gunearen inguruko hausnarketa, eta kultur jarduera eta eragileen arteko koordinazioa lantzea.
Udala hasi da gai horiek lantzen, baina herritarren arteko lan taldeak sortzea ere proposatu da, jendea inplikatzeko. Talderen batean parte hartu nahi duena, udal teknikariarekin harremanetan jar daiteke, Biterin.