Abenduaren 13an Hernanin joko du Alan Griffin eta Joxan Goikoetxeak zuzentzen duten Alboka folk taldeak, eta emanaldi horrek emango dio hasiera, 25garren urteurrena ospatzeko birari.
Emanaldia 20:00etan izango da, Biterin, eta bertan daude sarrerak salgai.
Oraingoan ere ez dira bakarrik ariko bi hernaniarrak, eta lagunen artean hernaniar gehiago ere izango dira; Lurra, Ur, Haize azken diskoa aurkeztuko dute, Juanjo Otxandorena, Xabi San Sebastian, Iosune Marin, Arkaitz Miner, Iraide Ansorena eta Julio Andradek lagunduta.
Dantza eta erromantzeak
Aztarna argitaletxeak iazko Durangoko Azokan aurkeztu zuen Alboka taldearen azken diskoa: Lurra, Ur, Haize. Alan Griffin irlandar hernaniarraren eta Joxan Goikoetxea hernaniarraren gidaritzapean, 25 urte egin ditu Alboka folk taldeak, eta disko horretako 17 kantuetan nabari da esperientzia hori.
Taldearen bosgarren lan honetan, dantza eta erromantze zaharrak bildu dituzte.
Akordeoiak eta abesbatzak
Abenduan sartu baino lehen, ordea, musika gehiago ere izango da Hernanin.
Ostiral honetan, adibidez, ‘Hernani’ Musika Eskolako akordeoi ikasleek entzunaldia emango dute Milagrosan, 17:30etan, eta Kantuz eta Astigarragako Aiztondo abesbatzek San Joan Bataiatzailea elizan kantatuko dute 20:00etan.