Biharkoa ospakizun eguna izango dute Dobera Euskara Elkarteak eta Dobera osatzen eta laguntzen duten bazkide eta herritar guztiek. Izan ere, 25 urte bete dira elkartea sortu zela.
Egun osoko festari goizeko 11:00etan emango zaio hasiera. Doberako begiraleek gidatuta, umeentzako hainbat jolas, tailer eta dantza saio egingo dira. Eguraldi ona badago, Tilosetan jarri dute zita, eta bestela, Atsegindegin. Batean edo bestean, Burruntziren bisita ere jasoko dute, eta Latxe aldizkariak izango dira eskura.
Bestalde, eguerdiko 13:00ean omenaldia egingo zaie Dobera sortzen lagundu zuten hainbati, Tilosetan bertan; eta eguraldia txartzen bada, Xalaparta elkartean.
Hain zuzen, Xalaparta elkartean borobilduko da festa, kantu-bazkariarekin.