Egun haundia izanen da gaurkoa, Goizuetan. Feria Eguna ospatuko dute, bere 15garren edizioan, eta makina bat postu jarriko dituzte, herrian zehar; guztira, 90-100 postu inguru izanen ditu, azienda, artisau eta nekazal feriak; horietako asko, herriko jendeak jarritakoak.
Babarrunak eta betizu gisatua, bazkariko menua
Baina protagonismo haundiena, betizuek izanen dute aurtengoan. Izan ere, azienden erakusketetan bakarrik ez, toki berezia egin diote aurten betizuari, herri bazkari jendetsuan ere: betizu gisatua jarri dute menuan, eta plateraz gozatzeko aukera izanen dute, 450-500 lagunek.
Betizuaren aurretik, ohi bezala, babarrun jatea eginen dute; eta ondoren, postrea ere izanen da. Txartelak, aurrez erosi behar ziren, Amaia kafetegian. Osteguna zen azkeneko eguna, erosteko.
Herriko artisauek, makina bat erakusketa goizean
Ferian, bertako azienden protagonismoa haunditzeko egin dute saiakera berezia aurten, baina herriko artisauek ere, tarte ederra izanen dute, goiz osoan zehar: goizeko 10:00etan hasita, ordu laurdenero eginen dituzte erakusketak. Hori horrela, urteroko ekitaldiarekin hasi, eta banan-banan hartuko dute bere tartea: ataka bazterren egileak, sagardogile eta garagardogileak, egur tailan aritzen direnak... Ardien desfilea ez da faltako, ezta trikitilariak ere. Jubilatuen etxekoek ere aurreratu dute, zer eginen duten: artilezko koltxoia urratu eta artilea joko dute, koltxoian sartzeko berriro.
Bazkalorduaren aurretik, giza proba desafioak Lubineko frontoira erakarriko du jendea, 12:30etan: goizuetar talde misto bat, Emarriko nesken kontra, ordu laurdeneko saioan.
Arratsaldea, berriz, Bixenteren musikak girotuko du.
FERIA EGUNA
GAUR, larunbata
10:00etan hasita: Herriko artisauen erakusketak. Orden honetan eta ordu laurdenero: ustaiak (Artantxukoak); sagardoa (Yandenekoak); sifoia (Luixin); egur taila (Garbiñe); ardien itzulia (Olaso eta Domiña); joareak (Belako); haria (Mikela eta Anttoni); koltxoiak (Jubilatuak); gaztainak (Koro eta Mertxe); eztia (Jimenez) eta garagardoa (Iñigo). Goizean zehar, trikitilariak kaleetan.
12:30etan, Giza proba, Lubineko frontoi aurrean: Goizuetako talde mistoa, Emarriko nesken kontra.
14:00etan, Bazkaria: babarrun jatea, betizu gisatua eta postrea. Txartelak Amaia kafetegian erosi behar ziren aurrez.
18:30etan: Musikaldia Bixenterekin, udaletxeko orapean.