Bihar da azaroaren 25a, Emakumeenganako Indarkeriaren Kontrako Nazioarteko Eguna. Eta salaketa hori, Urumea bailarako txoko guztietara zabalduko dute egun hauetan.
Dagoeneko asko izan dira, burutu dituzten ekintzak. Goizuetan, Hondarribiako alardeari buruzko hitzaldi batekin eman zieten hasiera, aurreko ostiralean, eta indarkeriaren normalizazioaren adibide gisa aurkeztu zuen Ilargi Bengoetxeak. Aranon, berriz, helduentzako ipuin kontaketa musikatua izan zuten igandean, Munduko emakumeak izenekoa.
Astigarragako Herri Eskolara ere eraman zuten gaia, eta ostegunean, bereziki prestatutako dantza bat eskaini zuten.
Eta Hernanin, hiru zita izan dituzte astean zehar: Buruberoki tailerra, Zaintza Plazara tailerra, eta Beldur Barik lehiaketako bideoen emanaldia.
«Gizarte demokratikoetan, onartezina, jasanezina eta eramangaitza da hau»
Biharkoa, manifestazioen eta aldarrikapenen eguna izango da. Astigarragan, bizikleta martxa egingo dute herrian barrena, 11:00etatik 14:00etara, zenbait txokotan liliak utziz, biktimak gogoratzeko. Hernaniko Koordinadora Feministak, bere aldetik, Plaza Berrin jarri du hitzordua, 13:00etan. Eta Aranoar eta goizuetarrak, azkenik, Iruñako Gaztelu Plazako manifestazioarekin bat egitera deitu dituzte, 12:00etan, baina Leitzan ere badaukate hitzordua, poteoa eta bazkaria egiteko.
Eta hain justu, Leitzan irakurri zuten atzo arratsaldean, aurrenekoz, bihar hamaika tokitara zabalduko duten adierazpen instituzionala.
Nabarmendu zuten, «indarkeria matxistaren egiturazko izaera, horixe baita gizonezkoek emakumeengan dituzten botere-harreman asimetrikoen adierazpenetako bat». Salatu zuten, gainera, genero desberdintasuna dela gaur egungo giza eskubideen urraketarik iraunkorrena: «hil dituzten emakumeak zenbatzea ohiko bihurtu da, ohikoegia, ematen baitu jada ohikoa dela ia egunero gizon batek emakume bat hiltzea. Ia-ia egunero izaten dugu erasotuak edo mehatxatuak diren emakumeen berri, beren askatasuna mugaturik ikusi eta beldurrez bizitzera kondenatuta daudenen berri. Hori, gizarte demokratikoetan, onartezina, jasanezina eta eramangaitza da. Ez dira zenbaki hutsak, gure bizitzak dira!».
Eta azpimarratu dute, urtero urtarrilaren 1ean, hil dituzten emakumeen «kontagailua zerora» jartzeak, galarazten duela ikustea genero indarkeriak, «gure gizartean den desparekotasun adierazpen ankerrenak, 947 emakumeren bizitzak eraman dituela espainiar estatuan, 2003az geroztik».
HERNANIN
BIHAR, Manifestazioa Plaza Berrin, 13:00etan, Hernaniko Koordinadora Feministak deituta. Precious pelikula Gaztelekuan, 17:00etan.
AZAROAK 27, Hedabideen papera indarkeria matxistaren aurrean: informazioa ala desinformazioa, 18:00etan Biterin. Mugarik Gabe GKEak egindako ikerketaren aurkezpena, eta ondoren, solasaldia Irati Sarasua Arabaolaza kazetariaren eskutik.
ASTIGARRAGAN
BIHAR, Bizikleta martxa herrian barrena, 11:00etatik 14:00etara. Bi taldetan banatuko dira, eta liliak utziko dituzte zenbait tokitan, emakumeen kontrako indarkeriaren biktimak gogoratzeko.
BIHAR, Gaiari buruzko saioa gazteekin, Gaztelekuan: kartelak egin gaiari eta egunari lotutako esaldi edota irudiekin; dokumental, esketx eta bideoak ikusi, eta ondoren hausnartu.
ARANO ETA GOIZUETARAKO DEIALDIAK
BIHAR, Poteo feminista, 13:00etan Leitzako Plazatik. 14:30etan bazkaria, Leitzako Torrea tabernan; txartelak bertan salgai: langabetuek 14 euro, enplegudunek 18 euro. Ondoren, Emakume basatia, Maider Galarza ipuin kontalariaren eskutik.
BIHAR, Manifestazioa, Iruñako Gaztelu Plazan, 12:00etan. Indarkeria Sexistaren aurkako Nafarroako Emakumeen Plataformak antolatuta.
AZAROAK 30, Amonaren istorioak: Amelie. Haurrentzako ipuin kontaketa. 18:00etan, Aresoko udaletxeko erabilera anitzeko gelan.