Gauzak ondo bidean datorren urtean ere Maialen trainerua uretan egongo da. Hernaniko Arraun Elkarteak jarraipena emago dio nesken txalupari, nahiz eta urtetik urtera ez den erraza taldea osatzea. Hala ere, Xabier Zabala entrenatzailea baikorra da hasi berria den denboraldiari begira. «Pasa den urtea oso gogorra izan zen eta Zumaiarrekin egindako akordioari esker izan zen posible trainerua osatzea. Urtearen sasoi honetan bost arraunlari besterik ez genituen. Aurten berriz arraunlari gehiago ditugu. Hamar-hamaika arraunlari badaude entrenatzen eta kopuru horrekin nik uste udaran Maialen trainerua estropadetan ikusi ahalko dela».
Bi neska berri hasi dira, bi berreskuratu ditu Hernanik, Donostiarratik arraunlari bat etorri da, eta kanpoan ikasten dagoen beste batekin 11-12 daude. «Printzipioz urtarrilera arte zain egon behar dugu ea nola doazen gauzak, baina aurrera aterako garela uste dut».
Nahiz eta traineru Ligak eta estropadak udaran jokatu, entrenamendu saioak azaroan hasten dira, eta orain osatu behar izaten dira taldeak. Udara iristean kanpotik etorri daitezke osagarriak, pasa den urtean Kataluniatik hiru arraunlari etorri ziren Hernanira eta aurtengorako ere «ilusioarekin daude bueltatzeko hiru badalonatarrak» dio Zabalak. «Patxada izango dugu entrenatzeko garaian».
«Aurreko urtea gogorra izan zen»
Hala ere, pasa den urteko denboraldiaren oroitzapena denak ez dira gozoak. «Urte benetan gogorra izan zen. Hasieran arraunlari gutxi genituen. Gero Zumaiarekin elkartu eta bertara joaten ginen entrenatzera asteburuetan, neska gazte gazteak eta inoiz traineruan ibili gabeak. Udaran sei neska gehiago iritsi zitzaizkigun eta bakarra zen aurretik arraunean ibilitakoa».
«Emaitzak ez dira denboraldi batean etortzen, blokearen ondorio dira. Taldeak eta arraunlariek urteetako jarraipena behar dute sendotasuna lortzeko»
Orain bi urte eta aurreko urtean, 14 arraunlarik utzi zuten urte bakoitzean
Taldea ateratzeko zailtasuna urteroko kontua izaten da, ez baitago jarraipenik eta hori botatzen du faltan Zabalak. «Orain bi urte hamalau neskek utzi ondoren hartu nuen taldea. Aurreko urtean beste horrenbeste baja egon ziren; Tolosako bost neska Tolosara bueltatu ziren, bertako beste hainbeste neskek utzi zuten, eta kanpotik etorritako beste lau neskek ez zuten gurekin jarraitu. Behin utzita, asko ez dira inoiz bueltatzen, nahiz eta batenbat berreskuratu; aurten Naroa eta Enara itzuli dira, esaterako».
Xabier Zabalak pena hartzen du begirada atzera botatzean. «Euskotren Ligara sailkatzeko bost segundotara geratu ginen bi estropadetan, Gipuzkoako Txapelketan laugarren, Kontxan bosgarren sailkatu ginen... Gorantza egin eta pauso batera geunden, baina ez zen posible izan».
Mirariak egin behar izaten dira arraunlariak erakartzeko eta batez ere arraunean jarraitu dezaten. «Ezinezkoa izaten da proiektu sendoa gauzatzea. Arraunlariak konturatu behar du emaitzak ez direla bat-batean lortzen edo ez direla egun batetik bestera iritsiko. Atzetik lana egin behar da eta batez ere blokea osatu. Orduan etorri daitezke emaitzak. Goiko postueta dauden ontzien zergatia horretan datza. Urteak egin dituzte elkarrekin eta horrexegatik egon dira maila altuan. Ez da izan izugarrizko maila eman dutelako bat-batean, baizik eta jarraipenari esker lortu dute aurrean ibiltzea. Eta hala eta guztiz ere aurten hamar neska izatea ez da gutxi».
«Oinarriak ez dira sendoak eta handik eta hemendik arraunlariak batuz osatzen dira traineruak»
Xabier Zabalak nesken arraunaren oinarri ahulak azalarazi nahi ditu soluzio bidean. «Oinarriak ez dira sendoak. Baina ez da Hernaniren gauza, talde gehienak daude egoera antzekoan edo berdinean. Donostiarrak handik eta hemendik arraunlariak bilduz osatu du txalupa, Arraun Lagunakek ere bi galiziar, bi ondarrutar, kataluniar bat, patroia ere bizkaitarra... behar izan ditu uretaratzeko. San Juanek dena irabazi du eta emaitza historikoak lortu ditu, baina taldea galiziarrak, bizkaitarrak, donostiarrak... bertakoak ez diren arraunlariz osatua egon da. Talde batzuek asteburuetan bakarrik uretaratu zezaketen trainerua».
Deia Elorrabira hurbildu eta arraunean hasteko
Hernanik deia egiten dio arraunean egin nahi duen orori probatzera eta Elorrabira hurbiltzea, 16:00etatik aurrera. Oinarri sendoak lortu behar dira eta klubak ontzi txikietako ligaxkei garrantzi gehiago eman beharko lieketela uste du Zabalak. «Euskotren Ligari begiratzen diote denek, eta aldi berean ez gara gai batel eta trainerilla ligaxka duina antolatzeko».
«Batel eta trainerilla ligaxka duinak antolatzeko zailtasunak daude»
Mutil infantil, kadete eta jubenilak ere badaude
Horrexegatik aurrera begiratzen du Hernaniko klubak eta oinarriarekin lanean dabiltza. «Mutilak Donostiara bideratzen ditugu eta neskak Maialen trainerura. Zazpi-zortzi jubenil daude eta hamar kadete inguru. Infantilak ere baditugu eta ligaxkan ongi ibiliko dira. Pasa den urtean ere emaitza onak lortu zituzten. Aurreko udaran Hernanitik ateratako arraunlari asko egon dira, eta ia denak Hernanitik ateratakoak izan dira».
Kontuan hartu behar da neskak jubenil mailan traineruan hasi daitezkeela eta ongi etortzen da hori. «Neskak adin horretan helduagoak dira. Ez da begi bistatik kendu behar hamar neska horiek ez baleude eta Maialen ateratzerik ez balego, Hernaniko Arraun Taldea seguruenik desagertu egingo litzateke. Hiru, eskarmentu haundiko arraunlariak dira».