Aurreko asteburuan atseden hartu ondoren, lehiara bueltatuko da gaur Hernani, Ohorezko Mailan. Eta partidu polita daukate trikoloreek, azkeneko partiduetan erakutsi duten maila berresteko, eta goiko postuak hain urruti ez daudela erakusten jarraitzeko.
Santanderreko Independienteren kontra jokatuko dute Landaren, arratsaldeko 16:00etan hasita. Talde indartsua da kantabriarra, baina sailkapenari begira, hain urruti ez dagoen horietakoa: lau garaipen lortu dituzte haiek, eta hiru trikoloreek, zortzi partidutan. Gaur irabazita, asko gerturatuko zaizkie, sailkapenean.
Eta garaipen hori ez dute urruti ikusiko, gainera. Ondo erakutsi dute aurten, edozein talderen kontra lehiatzeko gai direla; bereziki etxean, Quesosi irabaztetik oso gertu egon ondoren. Zaleen babesa izango dute lagun beste behin, gaurkoa festa bilakatu dadin, datorren astean Ordiziara joan aurretik.