Egunak dira herriko musikariak ospakizunetan murgildu zirela. Azkenekoz, asteartean bertan ‘Hernani’ Musika Eskolako ikasleak kale-jiran ibili ziren Musikalean ekimenaren bueltan. Baina gaurkoa da Santa Zezilia, musikarien patroiaren eguna, eta hori horrela, beste hiru emanaldi izango dira gaur.
Batetik, ‘Hernani’ Musika Eskola Publikoko ikasleek 18:30etan Biterin emango dutena. Tartean, aurreko ikasturtea gainditu duten ikasleei diplomak emango zaizkie.
Bestetik, 19:00etan (ez 19:30etan, kultur agendak dioen moduan), Goiz Eguzki abesbatza aterako da Plaza Berritik, eta Kaxkoan barrena 10 geldialdi egingo ditu 17 melodia kantatzeko.
Azkenik, Hernaniko Musika Bandak emanaldi txiki bat emango du 20:30etan udaletxeko arkupetan, «jarraitzaile fidelenei eskerrak» emateko. Izan ere, pasa den larunbatean eman zuen kontzertua Bandak, Biterin, baina tokirik gabe jende dezente geratu zen, eta haiengana hurbiltzeko kontzertuaren zati bat joko du berriro.