Beldur Barik ikus-entzunezkoen lehiaketako sari banaketa nagusia larunbatean egingo da, Gasteizen, baina bezperan, ostiralean, Hernaniko sariak banatuko dira, 18:30etan Biterin.
Sariak, bi mailatan
Indarkeria sexistari aurre egiteko beldurrik eza sustatzen duen programa da Beldur Barik, Euskal Autonomia Erkidegoko erakundeek elkarlanean martxan jarritakoa, eta besteak beste, lehiaketa antolatzen dute, gazteek jarrera hori oinarri hartuta ikus-entzunezko lanak egin ditzaten.
Hernanin, Udalak, Berdintasun Kontseiluak, Arremanitzek, Gaztelekuak eta herriko hainbat eragile feministek bultzatuta, sariketa propioa ere antolatu da azken hiru urteetan. Horrela, ostiraleko ekitaldian, gazte hernaniarrek aurkeztu dituzten bideoak ikusi ahal izango dira, eta ondoren, Hernaniko sariak banatuko dira: 150 euroko sari bana, 12 eta 17 urtekoek eta 18 eta 26 urte artekoek egindako bideo onenei.
Autobuserako eta botoa emateko, interneten
Sari banaketa nagusia, berriz, Gasteizen egingo da larunbatean, eta autobusa jarriko da bertara joateko. Izena emateko: www.beldurbarik.org.
Bestalde, publikoaren saria ere banatuko da bideoen artean, eta webgune horretan bertan eman daiteke botoa.