50 urte dira Lewis Carroll idazlearen Alizia herrialde miresgarrian euskerara itzuli zela, eta Galtzagorrik areto literario berezia sortu du, 10 eta 11 urtekoei bideratua. Gipuzkoan barrenako zirkuitua Hernanin hasiko du, gaurtik azaroaren 26ra.
Egun horietan ikastetxeetako Lehen Hezkuntzako bosgarren mailako ikasleek bisitatu ahal izango dute. Baina hilaren 26an publikoari irekiko zaio 17:00etan eta 18:00etan. Liburutegian eskatu behar dira gonbidapenak; 18:00etako saiorako bukatu dira.
Lau gune, jolas eta solaserako
Areto literarioa lau gunetan banatuko da, eta horietan, Lur Kortak dinamizatuta, jarduera eta jolas desberdinak egin eta liburuaren pasarteak irakurri ahal izango dira.
Liburuaren euskerazko azken bertsioa 2015ean Pamielak argitaratutakoa da, Manu Lopez Gasenirena. Bertan, liburuko errima, poema edota hitz-jolasak euskalduntzeko ahalegina egin zuen, eta hori aprobetxatzen da Biterin estreinatu den areto honetan: Aliziarekin abentura bat bizi eta landuko dira umore linguistikoa, ahozko literatura, haurraren garapen kognitiboa, arte heziketa edota moralaren eta jendartean ezarrita dauden arauen inguruko hausnarketa.