Aurreko igandean eman zuten bukatutzat Hernani Erabaki 2019 prozesu partehartzailea, eta talde eragileak ostegunean eman zituen aditzera aukeratuak izan diren proposamenak.
Beste behin, 500.000 euro zertan inbertitu erabaki dute hernaniarrek; zortzi proposamenen artean banatuko dira, 2019an (beheran, zerrenda).
1.176 boto, iaz baino 200 gehiago
16 urtetik gorako 1.176 hernaniarrek eman dute botoa aurten, erroldaren %6,77ak, eta iaz baino 200 herritar gehiagok (975 izan ziren).
Horrez gain, aurten aurreneko aldiz eman dute botoa 8 eta 15 urte bitarteko gaztetxoek, Eskola Agenda 21en bitartez. 615 boto izan ditu prozesuak bide horretatik, Ereñotzuko Txirrita Eskolako, Inmakuladako eta Hernani BHIko ikasleenak.
Bozkatzeko moduan ere aldaketak izan dira; Maitane Barrenetxea Aztiker soziologia ikerguneko teknikariak azaldu zuen aurten aurrenekoz, «aurrea hartu» diola internetak, postontziei: 709 boto eman dira online; 468, aldiz, postontzietan.
Diru-laguntza sozialei, 27.000 euro
Emandako botoetatik, 992 jaso ditu bozkatuenak, hau da, komun publikoak hobetzeak (65.000 euro). Segidan daude, beste biak: argiteria hobetzea, 965 botorekin; eta Erreka Eguna antolatzea, 950 botorekin.
Zazpigarren proposamenarekin 27.000 euro geratzen ziren 500.000 eurora iristeko, eta hori, nahiz eta hurrenkeran hamabigarrena izan, diru-laguntza sozialak haunditzera bideratuko da, segidan zeuden proposamen bozkatuenetan «aurrekontu malguena» duelako.
HERNANI ERABAKI 2018: boto gehien jaso dituzten 8 proposamenak
Komun publikoak hobetu: (1) Komun berria egin Portu-Karabel-Zubipe oinezko bidean, eta (2) guztietan haurrak aldatzeko euskarriak jarri (65.000 euro) - 992 boto.
Argiteria hobetu: (1) Iturmendiko eskaileratan, (2) Karabeleko parke eta aparkalekuan, eta (3) Zinkoeneako zubi amaieran
(28.000 euro) - 965 boto.
Ibai eta erreken garbitasuna mantentzeko ‘Erreka Eguna’ antolatu Hernaniko DBHko ikasleekin (5.000 euro) - 950 boto.
Bizikleta pista berri bat egin, eta horretarako proiektua, partaidetza prozesua eta obrarako aurrekontua jaso (120.000 euro) - 830 boto.
Karabel auzoan, Zubipe inguruan aparkaleku berria egokitu 70 plazarekin, beti ere Ura Agentziak baimena ematen badu (100.000 euro) - 782 boto.
Oinezko bideetan segurtasuna hobetu: (1) seinalizazioa Larramendi eta Onddi kaleen bidegurutzean, Elkano hasieran (Motos Santi parean), Atsegindegin; eta kohesistentzia guneka margotu (115.000 euro) - 778 boto.
Kutsadura murrizteko plana sortu eta Zarata Mapak antzeman dituen leku kritikoetan interbentzioak egin (40.000 euro) -
776 boto.
(*) Diru-laguntza sozialak haunditu: (1) babesgabetasun egoeretarako mikrokredituak eta (2) gizarte larrialdietarako
laguntzak (27.000 euro) - 668 boto.