Kale-irakurraldi berria egingo dute gaur Hernanin. Oraingo honetan Lapurreta gaia hartuta arituko dira, 25 testu irakurriz, Hernaniko bost banketxeen kutxazainetan. Guztira 25 irakurle arituko dira, testu bana irakurriz, eta lapurretaren inguruko hainbat ikuspuntu literario agertuz. Hitzordua goizeko 11:30ean jarri dute Biteri kultur etxeko atarian, bertatik abiatuko dira herriko Kaxkoa zeharkatuko duen ibilbidea eginez.
Musikaz lagunduta euskal kantuak
Aurrekoetan bezala, musika lagun arituko dira eta alde horretatik, izango da, lapurretaren gaineko hainbat euskal kantu entzuteko aukera.
Elkarlanean bildutako testuak eta musikak dira erabiliko direnak, eta bolondresak dira irakurle guztiak, edonork eduki du-eta, sorta batetik gustuko testua aukeratzeko parada.
Azkenik, jolas gisara, entzuleek asmatu beharko dute nortzuk diren testuen idazleak, eta trukean hainbat sari jaso ahal izango dituzte gehien asmatzen dituztenek.
Eduardo Galeano, Gotzon Barandiaran, Miren Amuriza, Castillo Suarez, Harkaitz Cano edo Leire Bilbaoren testuak izango dira, besteak beste, irakurriko dituztenak. Edozein literaturazalek badu hitzordua gaur Hernanin.