Tailer, solasaldi, manifestazio eta emanaldiak antolatu ditu Hernaniko Koordinadora Feministak datozen egunetarako, Emakumeenganako Indarkeriaren Kontrako eguna, azaroaren 25a, medio.
Buruberoki eta Zaintza Plazara tailerrak antolatu dira bihar eta etzirako, eta ostiralerako, Beldur Barik sari banaketa. Datorren astean, berriz, hedabideen inguruko solasaldia. Denen artean, ordea, igandeko manifestazioa azpimarratu dute Koordinadorako eragileek.
«Hau ez da justizia»
Igandean 13:00ean aterako da manifestazioa Plaza Berritik, Hau ez da justizia lelopean. Lau aldarrikapen egin nahi dira. «Salatu nahi dugu sistema judiziala patriarkala dela», azaldu dute: erreproduzitzen dituen ereduekin «erasotzaileak sortu eta zigortu egi-ten ditu, gure testigantzak zalantzan jartzen ditu, eta gizonen bulkada sexualak naturalizatzen ditu».
Bestetik, diote: «salaketa ez da bermea erasotua ez izateko». Era berean, eredu honek «zigorrean sinesten» duela salatu dute, eta «erreparaziorako baliabideak birpentsatzeko» aldarria egin dute. Azkenik, «emakumea* (izaera anitzekoa) erdigunean jarriko duen justizia, erreparazioan eta babesean oinarritua» aldarrikatu dute, eta gogorarazi, «ardura gizarte osoarena, kolektiboa» dela.
AZAROAK 25 - EMAKUMEENGANAKO INDARKERIAREN KONTRAKO EGUNA
Bihar, Buruberoki tailerra, 17:00etan Urumea Herri Gunean. Kamiseta zahar bat eraman.
Etzi, Zaintza Plazara tailerra, 18:00etan Iturolan.
Azaroak 23, Beldur Barik lehiaketako bideo emanaldia eta sari banaketa, 18:30etan Biterin.
Azaroak 25, Manifestazioa, 13:00ean Plaza Berritik abiatuta, Hau ez da justizia lelopean.
Azaroak 27, Mugarik Gabe erakundearen ikerketaren aurkezpena eta solasaldia, Irati Sarasua Arabaolaza kazetariarekin, 18:00etan Biterin: Hedabideen papera indarkeria matxistaren aurrean: informazioa ala desinformazioa.