Anbulatorioaren inguruan hiru eskaera zehatz egiteko, mozioa aurkeztu du EH Bilduk, «Udalak Eusko Jaurlaritzari hainbat eskaera egin diezazkion».
Alde batetik, «pediatra eta emaginaren zerbitzua indartzea» eskatzen dio Eusko Jaurlaritzari. Bestetik, «anbulatorioak legeak aipatzen dituen ratioak betetzen dituen jakin ahal izateko anbulatorioaren zerbitzuaren diagnostikoa egitea». Eta azkenik, «herritarrenganako zerbitzua hobetzeko, anbulatorioa arratsaldez irekitzeko aukera aztertzea».
Biztanleriaren hazkundea medio, egokitu beharra
Eskaera horiek arrazoitzeko hainbat datu ematen ditu alderdiak. Osasun zerbitzuan hobekuntza batzuk egin direla onartu arren, nahikoak ez direla azpimarratzen du, biztanleria kopurua haunditu delako.
«2005ean Astigarragako anbulatorio berria inauguratu zen. Joseba Barandiaran Plazako lokaletik gaur egungo kokagunera pasa zen anbulatorioa. Lokal haundiago eta hobeagora, zalantzarik gabe. Hala ere, 2005etik herria asko aldatu da. 2006an Astigarragan 4.242 biztanle baziren, egun 6.478 biztanlde daude, hau da, ia %53 biztanle gehiago. Alabaina, biztanleriaren hazkunde bortitz honek ez du bere egokitzapena izan anbulatorioan. Zalantzarik gabe, anbulatorioko profesionalen dedikazio eta esfortzuari esker zerbitzua aurrera atera dute, baina ez da nahikoa baliabide humano faltagatik».
«Gainezka dagoen zerbitzua»
Zerbitzua indartu dela ere azpimarratzen du, familia mediku berri batekin. Baina «pediatra eta emaginaren egoera kezkagarria» dela uste du. «Osakidetzaren arautegiaren arabera, 0-13 urte bitarteko 1.000 biztanleko, pediatra bat beharko litzateke anbulatorioan. Astigarragan dagoeneko 0 eta 13 urte bitarteko 1.213 haur daude, eta horrek pediatraren lana gainezka egotea dakar».
«2006an Astigarragan 4.242 biztanle baziren, egun 6.478 daude, hau da, ia %53 biztanle gehiago»
Egoera hori urteko garai batzuetan larritu egiten dela ere azpimarratu du. «Opor-aldietan pediatra zerbitzua Urnietarekin elkarbanatzen da eta horrek, dagoeneko gainezka dagoen zerbitzua hankaz gora jartzen du».
Emaginaren zerbitzuarekin ere antzeko zerbait gertatzen dela dio EH Bilduk. «Emakina Hernanirekin partekatzen da. Astigarragan 2 egunez egon beharko luke, baina bigarren egun hori Hernanin egiten du. Gutxi ez balitz, azken urteetan, haurren jaiotze kopuruak etengabea gorantz egin duela kontuan hartu behar da».
Hori guztia kontuan hartzeko eskatzen dio EH Bilduk Eusko Jaurlaritzako Osasun sailari.