Natura lozorroan sartzen da neguan: hostoak erortzen zaizkie zuhaitzei, adibidez. Baina Kutxa Ekogunea ez dago lozorroan, eta aisialdirako hamaika aukera eskaintzen ditu. Horietako bat, abenduko opor egunetarako Negulekuak. Aurtengo Negulekuetan, lozorrotik ateratzera gonbidatzen gaitu Kutxa Ekoguneak, eta Neguleku hauekin, etxeko gazteentzako programazio berezia antolatu dute, beti ere, naturarekin harremanetan egotea oinarri. Izenematea irekita dago interneten: www.ekogunea.eus.
Bi txanda, 3-10 urtekoentzat
Negulekuak 2008 eta 2015 bitartean jaiotako umeei zuzenduak dira, biak barne. Bi txanda daude aukeran: abenduaren 24tik 28ra, 25ean jai eginda, eta abenduaren 31tik urtarrilaren 4ra, urtarrilaren 1a jai eginda.
Goizeko 09:30etatik 13:30etara egingo dira, baina nahi duenak zaintza zerbitzurako ere eman dezake izena, 08:30etatik 09:30etara, edo jangelarako, 13:30etatik 15:00etara.
Gaiarekin lotuta, lozorrotik pixkanaka ateratzeko ekintzak egingo dira egunero. Aurrena, eguneko gaiarekin lotutako ipuina kontatuko da goxo-goxo Haur Parkean, eta gero, eguraldiak uzten duen guztietan, kanpoan, naturan egingo dira ekintzak: baratza landu eta inguruko animaliak ezagutu eta beraientzat aska edo janlekuak prestatu, besteak beste. Horrez gain, egun bereziak ere badaude, hala nola, inuxenteen eguna eta kontsumo jasangarria bultzatzeko gabon solidarioak.
Naturarekiko harremana, jasangarritasuna, jolas-librea
Aisialdirako aukera asko izaten dira neguko oporraldian, baina Kutxa Ekoguneako Negulekuen bereizgarria da naturarekin une oro harremanetan egoteko aukera ematen dutela. «Haurra-natura harremana sustatzen dugu, natura ezagutu, errespetatu, eta honela haurrengan, jasangarritasunaren bidea indartuz. Helburu hau lortzeko, jolasa erabiltzen dugu, haurren modu naturala baita, mundua ulertzeko», azaltzen du Irati Andoño Erdozain, arduradunak.
Bestalde, jasangarritasuna, Kutxa-Ekogunearen oinarri izanik, Negulekuetako jarduera guztietan ere oinarri da. Horregatik Negulekuetako tailerretan materialak berrerabiltzen dituzte eta kontsumo arduratsua eta jasangarria sustatzen dute, besteak beste haurrei etxetik materialak ekartzeko esanez, edota hondakin gutxiko hamaiketakoa ekarriz.
Era berean, hizkuntza ekologia ere zaintzen dute; hau da, euskararentzako asnargunea da Kutxa Ekogunea. «Hizkuntza ekologiak, hizkuntza guztien garapen jasangarri bat lortzea du helburu». Adin ezberdinetako haurrak ere nahasten dituzte taldeetan, «autonomia eta elkarlana bultzatzeko».
Azken batean, «gure Negulekuetan, naturan bizi, gozatu eta dibertituko gara, neguan ere naturak milakak aukera eskaintzen dizkigulako. Beraz ez geratu etxean lozorroan eta etorri Kutxa Ekoguneko Negulekuetara».
‘Haizearen dantza’, gaur
Negulekuez gain, Kutxa Ekogunean asteburu eta jai-egunetan tailerrak ere badira aukeran. Hilero larunbat goizetan, 11:30etan ipuin kontaketak izaten dira doan, eta igandetan, 12:00etan tailerrak, 5 euroan. Hileko azken igandetan, berriz, ipuin antzeztuak: azaroaren 25ean, Xanti muxarra. Eta noizean behin, ekintza bereziak; gaur, 12:00etatik 13:00etara, ‘Haizearen dantza’ tailerra. Izena emateko eskatzen da, interneten: www.ekogunea.eus.