Emakumeenganako Indarkeriaren kontrako Nazioarteko Eguna da azaroaren 25a, eta urtero bezala, hainbat ekintza antolatu dituzte Goizuetan eta Aranon ere, data horren bueltan, Ez dira zenbaki hutsak, gure bizitzak dira! lelopean.
Atzo arratsaldean bertan egin zuten horietako aurrenekoa, Goizuetan. Udaletxeko ganbaran elkartuta, Hondarribiako alardeari buruzko hitzaldia eskaini zuen Ilargi Bengoetxea Gartziak.
Eta Aranon, biharko jarri dute zita. Munduko emakumeak ipuin kontaketa musikatua eskainiko dute Maisuenean, helduentzat; 12 urtetik gorakoentzat, zehazki. Eguerdiko 12:00etan hasiko da.
Mendialdeko herrietarako, ekintza gehiago ere antolatu ditu, Gizarte Zerbitzuen Mankomunitateak. Leitzan, elkarretaratzea izanen da hilaren 23an, eguerdiko 12:00etan Herriko Plazan; eta Areson, haurrentzako ipuin kontaketa antolatu dute azaroaren 30ean, arratsaldeko 18:00etan udaletxeko erabilera anitzeko gelan.
Nafarroa osorako bi deialdi ere izanen dira, datozen asteotan. Batetik, gaur, Emakumeenganako indarkeriaren aurkako gazteen II. topaketa eginen dute, Atarrabiako kultur etxean, 16:00etan hasita. 14 eta 30 urte bitarteko gazteentzat da, eta aurrez eman behar da izena: 684 261 593. Doako garraioa ere eskainiko dute. Eta bestetik, azaroaren 25ean bertan, manifestazioa deitu du Iruñan, Indarkeria Sexistaren aurkako Nafarroako Emakumeen Plataformak. Eguerdiko 12:00etan izanen da, Gaztelu Plazatik abiatuta.
Jostailu eta ipuin ez sexistei buruzko saioan, izenematea
Eta berdintasunarekin lotuta, Gabonak gertu daudela aprobetxatuz, jostailu eta ipuin ez sexistei buruzko hitzaldia antolatu dute Goizuetan, azaroaren 26rako. Eskolan izanen da, arratsaldeko 17:00etatik aurrera. Bertan, landuko dute zein izan daitezkeen «jostailuak hautatzeko irizpideak», eta animatuko dituzte «betiko ipuinak kontatzeko ikuspegi berriak» probatzera.
Parte hartzeko, izena eman behar da aurrez, hilaren 22ra arte: 674 08 69 26 zenbakira idatzi whatsappez; edo deitu 948 51 08 40 telefonora.
AZAROAK 25
Emakumeenganako Indarkeriaren Aurkako Nazioarteko Eguna
GAUR, Emakumeenganako indarkeriaren aurkako gazteen II. topaketa.
16:00etan, Atarrabiako kultur etxean. 14 eta 30 urte bitarteko gazteentzat. Izenematea: 684 261 593.
BIHAR, Munduko emakumeak ipuin kontaketa musikatua, 12 urtetik gorakoentzat.
12:00etan, Maisuenean.
AZAROAK 23, Elkarretaratzea eta adierazpen instituzionalaren irakurketa.
12:00etan, Leitzako Plazan.
AZAROAK 30, Amonaren istorioak: Amelie. Haurrentzako ipuin kontaketa.
18:00etan, Aresoko udaletxeko erabilera anitzeko gelan.
AZAROAK 25, Manifestazioa, Iruñako Gaztelu Plazan, 12:00etan.
Indarkeria Sexistaren aurkako Nafarroako Emakumeen Plataformak antolatuta.