Hainbat musika emanaldi izango dira herrian datozen egunetan, Santa Zeziliaren omenez. Musikarien patroiaren eguna da azaroaren 22a, eta horren bueltan antolatu dira kontzertuak. Gaur, bi.
Eguerdian, dantzari, txistulari eta tronpeta-joleak ariko dira Kaxkoan barrena, eta iluntzean, Musika Bandak emango du kontzertua.
Kale-buelta, eguerdian
Elkarrekin ariko dira Ttarla dantza taldea, Hernani eta inguruetako txistulariak eta tronpeta-joleak. Eguerdiko 12:30etan jarri dute zita, Plazan, eta Kaxkoan barrena ibiliko dira kale-bueltan.
XX. mendeko maisulanak, Musika Bandak
Eguneko bigarren emanaldia, Musika Bandak 19:00etan Biterin emango duena izango da.
Denera, 60 musikari baino gehiago igoko dira oholtza gainera, eta askotan ikusten ez diren musika-tresnak ere joko dituztela jakinarazi dute, klarinete eta saxofoi kontrabaxuak, esaterako.
Sei obra joko dituzte, «XX. mendearen lehen zatian idatzitako maisulanak» denak. Musika bandarako originalak dira lau obra, eta moldaketak, beste bi: Fanfare for the common man (Aaron Copland), He-Down, Rodeo (Aaron Copland), Valencia (Santiago Lope), Rapsodia Vasca (Vicente Behobide), Júpiter, The Planets (Gustav Holst) eta First Suite in Eb, I Chaconne, II Intermezzo, III March (Gustav Holst).