Dagoeneko zabalik dago epea, 2019ko inauteriak iragartzeko kartel lehiaketan, proposamenak aurkezteko. Deialdia egin du Hernaniko Udalak, eta abenduaren 10eko eguerdiko 14:00ak arte aurkeztu daitezke lanak, Biteri kultur etxean; kartazal itxian, eta sinadurarik gabe.
32 zentimetroko altuera eta 48ko zabalera izan behar dute lanek, eta formatu digitalean aurzkeztu behar dira ezinbestean, 300 ppp erresoluzioan eta CMYK erako koloretan; aukera dago, digitalarekin batera, paperean edo kartoi-luman ere aurkezteko. Hernaniko Inauteriak 2019 izenburua izan behar du kartelak.
Proposamenak jasota, Inauterietako Jai Batzordeak egingo du aurreneko aukeraketa bat; herritarrek bozkatuko dute gero, abenduaren 12tik 26ra, Biterin edo internet bidez; eta Kultura Batzordeak berretsi ondoren, abenduaren 28an jakinaraziko da irabazlea.
600 euroko saria, irabazleak
Aukeratutako kartela izango da, datorren urteko inauteriak iragartzeko erabiliko dutena; eta lan horren egileak sari potoloa jasoko du: 600 euro.