Santa zezilia eguna azaroaren 22an ospatzen da, baina datorren larunbatean, hilaren 17an, hainbat ekitaldi antolatu dira. Lehenengoa Kaxkoko kaleetan zehar antolatu da. Hernani eta inguruko txistulariak, tronpeta joleak eta Ttarla dantza taldea, 12:30etan, irtengo dira.
19:00etan, Biteri kultur etxeko auditorioan, Hernaniko Musika Bandak zita hartua du bere jarraitzaileekin kontzertu berezi bat eskaintzeko.
Kontzertu honetan 20garren mende hasierako obrak eskainiko dira. Hernaniko Musika Bandak 60 musikari baino gehiago jarriko ditu oholtza gainean. Hernanin inoiz ikusi ez diren instrumentuak izango dira: klarinete kontrabaxua, saxofoi kontrabaxua, bost tronpa, zortzi tronpetalari… dimentsio erraldoi honekin soilik lortu daiteke obra hauen interpretazio egokia.
Hernani Errotzenen eskutik
Hernani Errotzenen eskutik, 20:00etan, Donosti Ereski Gregoriar Scholaren kontzertua egongo da San Joan Bataiatzalea parrokian. Gipuzkoako, azken mendeetako Kodize edo Kantoraletatik aukeratutako abesti sorta bat eskainiko dute eta tartean Joan Manuel Larrarte Hernaniko parrokian organista izan zenaren obra bat ere entzun ahal izango da. Hernaniko organista eta lehen letretako maisua izan zen Larrarte.