Dobera Euskara Elkartea 25 urte betetzen ari da aurten eta urteurren borobila ospatu nahi du, ibilbide honetan bidelagun izan dituen guztiekin: bazkideekin, elkarteekin, taldeekin eta herritar guztiekin.
Azaroaren 24an izango da, 25 urteak ospatzeko festa. Eta egun horretarako, egun osoko egitaraua prestatu dute.
Kantu-bazkaria ere antolatu da. Xalapartan izango da, Imanol Kamio eta Aitor Atxega musikarien laguntzarekin. Txartelak salgai daude, azaroaren 16ra arte: helduek 25 euro, bazkideek 20 euro, eta haurrek 10 euro (plazak mugatuak dira).
Bi menu izango dira aukeran; helduena, honakoa: mokadutxoa, babarrunak bere sakramentuekin (txorizoa, odolkia, txerri saiheskia, aza eta Ibarrako piperrak), ogia eta edaria, postrea, kafea eta kopa. Haurrentzat, berriz, makarroiak, xolomoa patatekin, ogia, edaria eta helatua.
Txartelak salgai daude Dobera Euskara Elkartean bertan: bulegoan (Larramendi, 11 behea), 943 33 27 99 telefonoan eta dobera@dobera.eus emailean.
Aurretik, txikienak izango dira protagonista. Haurrentzako jolasak izango dira Tilosetan, Doberako begiraleen eskutik. Eguraldi txarra eginez gero, Atsegindegin izango da. Bertan egongo da Latxe aldizkariko Burruntzi ere umeekin jolasean eta giroa animatzen.
Omenaldia, Dobera Euskara Elkartea sortu zutenei
Jolasen ondoren, omenaldietarako garaia iritsiko da. Tilosetan elkartuta (eguraldi txarrarekin, Xalaparta elkartean), omenalditxoa egingo diete, Dobera Euskara Elkartea sortu zutenei orain 25 urte, 1993an.