Azken txanpan murgilduta dabil Euskara Ari Du kultur elkartea, «indartsu baino indartsuago!». Izan ere, dagoeneko badira 919 erronkalari, Hernanin hizkuntza-ohiturak aldatzen ari direnak. Hasiera batean, abendurako 1000 erronkalari izatea nahi dute, «milatik gora» izango balira ere, «ez legoke gaizki».
Horretarako, «erronkalari guztien artean zenbateko hori gainditzeko gaitasuna» badagoela adierazi du elkarteak. Hori horrela, «zeregin txiki bat» eskatu diete erronkalariei: «astebetean beste erronkalari bat ekarri eta hark izena ematea lortzea». Eta gogorarazi dute: «edozein izan daiteke erronkalari, baldin eta hizkuntza-ohiturak aldatzeko prest badago».
Hain zuzen, «erronkalari bakoitzak mezua zabaltzen eta beste erronkalari bat ekartzen badu, azken hilabetean ikusgarritasun haundiagoa emango zaio ekimenari, beste ehunka lagun jarriko baitira harremanetarako hizkuntza euskeratzeko klabean».
Izena emateko hainbat bide daudela adierazi dute: www.euskaraaridu.eus, Biteriko sarreran dagoen postontzia, 673 926 133 telefonoa edo Larramendi 11ko lokalera joatea.