2012an SOS Arrazakeriak taldeak Bizilagunak ekimena sortu zuenetik, urtero-urtero errepikatzen den eszena izango da gaur Hernanin ere, AMHERrek koordinatuta: han eta hemengo familiek, kultura ezberdinetakoek egingo dute bat mahaiaren bueltan.
Bertako eta kanpoko herrialdeetakoak elkar ezagutzeko ez ezik, bakoitzaren jakiak elkartrukatzeko ere, aukera ederra izango da. Aurten, Hernaniko 52 familiak baliatuko dute aukera hori; 200 pertsonatik gora izango dira, 26 bazkaritan banatuta.
Horrez gain, zortzi bazkari izango dira gazteen artean, 70 gaztek baino gehiagokbazkalduko du, lagun giroan.
Hamasei herrialde
Horiek guztiak kontuan hartuta, hamasei herrialdek egingo dute bat, AMHERrek eskainitako datuen arabera: Sahara, Maroko, Senegal, Nigeria, Ghana, Mali, Kolonbia, Bolivia, Peru, Nicaragua, Honduras, Guatemala, Mexiko, Mongolia, Uzbekistan eta Euskal Herriak.
Hitzordua, Plazan
Bazkaritara joan aurretik, hitzordua jarri dute Plazan, 13:00etan. Bertan, bertsoak kantatuko dituzte. Ondoren, taldeko argazkia aterako dute. Gazteak, aldiz, 12:30etan elkartuko dira Atsegindegin, eta denak batera joango dira Plazara. 17:30etan, berriz egingo dute bat, Gaztetxean.