Denbora tarte batez Udalak kudeatu ondoren, berriro argitaratu dute Zubimuxu aterpetxea kudeatzeko lehiaketarako deialdia. Hala erabaki zuen Goizuetako udalbatzak urriaren 17an egindako Osoko Bilkuran. Azaroaren 1ean hasi zen proposamenak aurkezteko epea, eta hilaren 26ra arte, azaroko azken astelehena arte, egin ahal izanen da, Goizuetako Udalaren idazkaritzan, goizeko 09:00etatik 12:30etara. Bertan daude, baita ere, administrazio-baldintza partikularren eta teknikoen pleguak eta gainerako agiriak, interesdunen esku.
Bi urteko emakida
Bi urteko kontratua eskainiko zaio kudeatzaileari; ondoren, urtero luzatu ahal izanen da, hiru urtez, eta gehienez, bost urte egin arte. 7.438 eurokoa da balio estimatua, BEZik gabe eta luzapenak barne; urtekoa aldiz, 1.487,60 eurokoa da, BEZik gabe.
30 plaza ditu eta zerbitzu desberdinak ere bai
Herriaren erdialdean dagoen aterpetxea da Zubimuxu, XVI. Mendeko eraikina da, baina 2012an guztiz berritu zen. XIX. Mendeko labaderoa da mantendu den bakarra. Mendizaleak, aisialdi taldeak, eskola ttikiak hartzen dituzte bertan eta herriko festak eta ekintzak dauden garaian ere erabiltzen da. Kokapena ezin hobea da, herri erdian zubiaren ondoan, eta horren balioa ere azpimarragarria da.
Aterpeak 30 plaza ditu, baita sukalde-jangela eta beste hainbat zerbitzu ere bertakoen erosotasunerako: egongela, garbiketa gela, ordenagailuak, lorategia...
Arreran bi ordenagailu erabili daitezke, arropa garbitzeko labadora ere ez da falta aterpetxean. Nahi izanez gero ere gosaltzeko zerbitzua eskaintzen da. Sukalde txikian sukaldatu daiteke eta bizkletak uzteko ere gela txikia dago bizikletaz mendi buelta egin duenarentzat.