Bi aste barru, maiatzaren 24an, izanen da Feria Eguna, Goizuetan. 15garren edizioa du azienda, artisau eta nekazal feriak, eta dagoeneko egitaraua prestatu da. Aurten ere ez da posturik faltako, ezta jatekorik eta musikarik ere. Gainera berrikuntzak daude eta betizuk inoiz baino protagonismo haundiagoa izanen dute. Berezia da aurtengo Feria Eguna. Guztira 90-100 postu inguru egongo dira eta horietako asko herritarrek osatua. Baita kanpotarrek osatua ere.
Euskal Herriko betizuen portzentai haundia, gehiena ez esatearren, Goizuetan bertan dago, baita esplotazio ugari ere. Azienden erakusketaz gain, aurten, nobedade bezala, mahaian ere egonen da Betizua. 450-500 pertsonentzako bazkari herrikoia antolatuko da, urteroko legez, eta ohiko menuan, babarrun jateari, gehitu behar zaio betizu gisadoa. Ondoren postrea egonen da.
Aurtengo ediziorako bertako azienden protagonismoa haunditzea izan da helburua eta horrexegatik herriko aziendek presentzia gehiago izanen dute feriko eremuan. Kanpaina berezia egin da, gutun bidez eta ahoz aho, azienden esplotazioetako jabeekin hurbiltzeko feriara.
Beraien aziendak feria eremura ekartzeko eta berriz bueltan esplotazioetara eramateko, Udalak garraioa jarri eta ordainduko du.
Artilezko koltxoia forratuko dute jubilatuek
Goizeko 10:00etan hasiko da feria, urteroko ekitaldiarekin. Herriko artisauen erakusketak ere izanen dira, ordu laurdenero, 13:00ak arte: ataka bazterrak, sagardoa zein garagardoa, sifoia, egur taila, ardien itzulia, joareak, torrijak, harri taila... Goiz osoan ariko dira trikitilariak ere, kaleak alaitzen, eta ardien desfilea ez da faltako.
Jubilatu etxekoen ekitaldian aurten artilezko koltxoia urratu eta artile hori joko dute, berriz koltxoian sartzeko.
Giza proban desafioa
Aurtengo beste berrikuntza garrantzitsua giza proba desafioa izango da. Bertan lehiatuko dira Emarriko neska taldea eta Goizuetako talde mistoa. Emarri Astigarragako giza proba taldea da. 12:30etan hasiko dute saioa Lubineko frontoi atarian eta 15 minutuko saioa izanen du talde bakoitzak. Goizuetako talde mistoa honakoa izanen da: Iñaki Etxeberria, Patxi Etxeberria, Mikel Huitzi, Uxue Mutuberria, Mayi Zelarain, Ibai Zugarramurdi, Naroa Zugarramurdi eta Xabi Zugarramurdi.
Emarri osatzen dute Ainhoa Alzugarai, Eider Arco, Eneritz Arbelaitz, Araitz Elgeta, Maialen Garciarena, Irati Gaztelumendi, Ane Oskoz eta Izaskun Urrestarazu tiralariek. Eguerdiarekin, berriz, bazkariaren txanda iritsiko da, eguerdiko 14:00etan. Amaia kafetegian erosi daitezke bertarako txartelak.
FERIA EGUNA - AZAR0AK 24
10:00etan hasita: Herriko artisauen erakusketak. Orden honetan eta ordu laurdenero: ustaiak (Artantxukoak); sagardoa (Yandenekoak); sifoia (Luixin); egur taila (Garbiñe); ardien itzulia (Olaso eta Domiña); joareak (Belako); haria (Mikela eta Anttoni); koltxoiak (Jubilatuak); gaztainak (Koro eta Mertxe); eztia (Jimenez) eta garagardoa (Iñigo). Goizean zehar, trikitilariak kaleetan.
12:30etan: Giza proba, Goizuetako talde mistoa vs Emarriko neskak.
14:00etan: Bazkaria. Babarrun jatea, betizu gisadoa eta postrea. Txartelak salgai Amaia kafetegian: 8 urtetik beherakoek doan, 9-16 urtekoek 10 euro, ikasle eta langabetuek 18 euro, eta langileek 21 euro.
18:30etan: Musikaldia Bixenterekin, udaletxeko orapean.