Azaroak 20a da Haur eta Nerabeen Eskubideen Nazioarteko Eguna, eta Astigarragan ere ospatuko dute, bi zita jarri baitituzte Xaguxar aisialdi taldeak, Gaztelekuak, eta Astigarragako kale hezitzaileek.
Egun batzuk lehenago izango da aurrenekoa, ospakizun nagusia. Gaur zortzi, datorren larunbatean, festa antolatu dute Joseba Barandiaran plazan. Arratsaldeko 16:30etan hasita, denetik izango da bertan. Besteak beste, artisten gisara ariko dira: batetik, henna eta txapa tailerrak jarriko dituzte, haur eta nerabeak eskulanetan aritzeko; eta bestetik, mural bat ere egingo dute, bertan.
Gainera, merienda garaian, txokolate beroa jateko aukera izango dute, eta ondoren, dantzan jarriko dituzte denak, musikari bidea eginda: dantzaldia eskainiko du KI disko jartzaileak, festa borobiltzeko.
Gainera, arratsalde osoan zehar, kutxa bat egongo da bertan, haur eta nerabeek beraien eskaerak utzi ditzaten.
Henna eta txapa tailerrak, murala, txokolate jatea eta KI DJaren eskutik dantzaldia izango dira, gaur zortzi.
Printzipioz, Joseba Barandiaran plazan izango da festa, baina eguraldi txarra egingo balu, tokiz aldatuko dute, eta Txomiñene frontoian izango da orduan. Antolatzaileek jakinarazi dute, azkenik, arratsalde osoan zehar, gurasoen ardurapean egongo direla haurrak, festan parte hartu arren.
Udal ordezkarien bisita Gaztelekura, gaztetxoen proposamenak jasotzeko
Haur eta Nerabeen Eskubideen Nazioarteko Egunean izango da bigarren zita, azaroaren 20an bertan. Egun horretan, Gaztelekura bisita egingo dute Astigarragako udal ordezkariek, arratsaldeko 17:00etan. Asmoa da, haur eta nerabeek egindako proposamenak jasotzea, eta konpromisoa hartzea, eskaera horiei erantzuteko.