Waterpoloa Gipuzkoara Hernanitik sartu zen. Iñaki Iurramendiren gidaritzapean 80garren hamarkadaren erdialdean Gipuzkoako lehendabiziko taldea sortu zen. Talde horren partaide ziren besteak beste: Iurramendi anaiak (Iñaki, Iosu eta Joseba), Xabier Balerdi, Jose Luis Fernández, Eduardo Vázquez, Luis Goñi, Javier Seminario, Ibon Mendoza... Portugaleten jokatu zuten lehenengo partidua eta 14-1 galdu zuten. Gipuzkoar talde batek jokatzen zuen lehendabiziko partidua izan zen.
30 urtetik gora pasa dira ordutik. Hernani erreferente zen Gipuzkoako waterpoloan urte askotan, baina leku hori galtzen joan zen urteak pasa ahala, beste talde batzuen bultzadarengatik. Orain, bere lekutxoa nahi du berriz ere eta indartze bidean dabil.
Jon Imanol Fernández Sánchez da entrenatzailea eta orain aste gutxi hasi zuten denboraldi berria. Hernani Waterpolo taldea Euskadiko Bigarren Mailan dabil jokatzen eta nesken taldea berreskuratuko dute, jubenil mailan. «Aurten jende berria etorri zaigu, aurretik ibilitakoak, eta itxaropentsu hasi dugu denboraldia. Itxura ona du taldeak, Liga bi multzotan dago banatua eta gure asmoa da goiko postuetan ibiltzea».
Multzo batean sei talde daude eta Hernaniren multzoan bost. «Nahiz eta talde bat gutxiago egon sailkapeneko lehendabiziko hirurak beste multzoko lehendabiziko hirurekin igoera fasea jokatzen dute. Eta guk hor nahi dugu sartu, nahiz eta igoera lortzeko mailarik oraindik ez dugun».
Orain arte hiru partidu jokatu dituzte; Getxo, Gasteizeko Lautada eta Burgoseko Castellaeren kontra. «Etxean jokatu ditugu hiru partiduak eta Getxo eta Lautadaren aurka galdu egin genuen eta Castellaeren aurka irabazi». Lehendabiziko itzulia amaitzeko bart gauean Loiuko Lauro ikastolaren kontra jokatu zuten. «Getxo eta Lautada dira talde indartsuenak».
Lehendabiziko zortzi partiduak jokatuta amaituko dute lehenengo fasea eta ondoren beste multzoko taldeen aurka hasiko dute bigarren fase erabakiorra. «Apirilean amaitzen da denboraldia».
Fortunarekin batera jubenil neskak eta senior taldea
Aurten bi talde ditu Hernanik eta horietako bat Fortunarekin batera lehiatzen da. «Senior mutilen taldea daukagu Euskadiko Bigarren mailan eta bestetik nesken jubenilena ere bai. Fortunarekin hitzarmen bat sinatu dugu eta biak elkarrekin taldea osatu da». Pasa den urtean jubenil mutilekin gertatu zen gauza berdina eta kadete mistoan ere elkarrekin aritu dira.
Berriz ere indarra hartzeko bidean dabil lanean Jon Imanol Fernandez. «Taldea eraberritzen ari gara. Harrobiarekin lanean ari gara eta oinarrizko lana sendotu nahi dugu. Azpitik hasi eta goraka hazteko bidea egin nahi da klubean. Eskolekin elkarlanean eta eskola kirolaren bultzadarekin gazteak animatu nahi ditugu waterpoloa egitera. Ikusi dezaten nolakoa den kirola eta zergatik ez, hasi daitezen kirol erakargarri honetan jokatzen».
Jon Imanolek argi du oinarrizkoa dela gaztetatik waterpoloaren kontzeptuak hartzea. «Asko nabaritzen da. Harrobi sendoa duten taldeak dira gero joko maila altuena dutenak. Nola jokatzen den gaztetatik ikasten da. Gure asmoa hori lortzea da, gazteak disfrutatzea eta kirol ‘ezezagunera’ hurbiltzea».
Ez da ahaztu behar waterpoloa izan dela, mutilen estatu mailako selekzioetan, Munduko eta Olinpiar txapeldunak geratu diren lehenengo kirola. 1998an osatu zuten bidea Pertheko Munduko Txapelketan, 1996an Atlantako Joku Olinpikoetan txapeldun geratu eta gero.
Balioan jarri behar da Hernanik izan duen historia kirol honetan. Gipuzkoan bidea irekitzea ez baita beti xamurra. «Aitzindaria izan da Hernani. Orain badaude taldeak zerotik hasi eta asko indartu direnak. Nahiz eta gu izan lehendabizikoak, orain guk egin behar dugu bide hori».
Horrexegatik egiten du dei Jon Imanolek gazteak animatu daitezen. «12, 13, 14 urte egokiak dira kirol honetan hasteko, baina gazteagoekin saiatzen ari gara. 10-12 urtetik aurrera tokia egiten dugu».
«Nahiz eta Gipuzkoan Hernani izan aitzindari, orain guk egin behar dugu zerotik hasi eta gorako ibilbidea gazteekin lanean hasita»
Euskadiko lehendabiziko mailan daude Donostiako Fortuna eta Waterpolo Donosti, Irungo Bidasoa eta Eibarreko Urbat taldeak. Hernaniren mailan dago Donostiako Easo.
Waterpoloko talde gehienek duten arazoa entrenatzeko lekua izaten da. «Erabiltzaileak daudenean zaila da entrenatzea. Egia esan igerileku berriarekin gauza ez da asko aldatu. Instalakuntza berritu da, tarteren bat lortu dugu, ostiraletan txikiekin lantzeko, baina seniorrek eta jubenilek zortzietatik aurrera entrenatu behar izaten dugu lehen gertatzen zen bezela. Baloiarekin entrenatu behar izaten da eta horretarako lekua behar da. Ez da erraza. Bederatzietatik aurrera igerilekua guretzako geratzen da, ez da gutxi».
27 jokalari guztira eta gaztetxoetan gehienak neskak
Gaztetxo gutxi daude, baina badauzkate. «Neskak dira gehienak. Lortu dugu maila desberdinetan neskak edukitzea; behetik hasi eta jubenilak arte. Guretzako garrantzitsua da jokua ikastea eta disfrutatzea».
Guztira 25-27 jokalari ditu klubean Hernanik. «Egunero gaude igerilekuan entrenatzen. Kepak orain atera berri du entrenatzaile titulua eta bien artean nesken entrenamenduak eramango ditugu».
Gurasoen laguntza ere eskertzen du Jon Imanolek «gazteen bidaietarako».