Aurreko asteko Plenoan onartu zituen Astigarrako Udalak, datorren urterako udal aurrekontuak. Eta datozen egunetan, auzoz auzo aurkeztuko dizkie, herritarrei. Horretarako, sei zita jarri dituzte.
Asteartetik ostegunera bitarte izango dira bilerak, sei toki ezberdinetan. Eta bakoitzean, zonalde jakin batzuetako biztanle, elkarte edo taldeei luzatu diete gonbitea, bereziki. Udaletxeko pleno aretoan izango da aurrenekoa, asteartean, eguerdiko 13:30etan; eta horretara, kultur eta kirol elkarteak, Harituz elkartea eta jubilatuak deitu dituzte, bereziki.
Asteartean bertan, baina arratsaldean, Santiomendi eta Ermañako bizilagunekin bilduko dira, 18:30etan Plazetxen. Eta iluntzean, Perurena eta Bentetako biztanleekin elkartuko dira, 20:00etan Perurenako frontoian.
Asteazkenerako jarri dituzte hurrengo bi zitak: Oialume eta Ergobiako bizilagunekin, 18:30etan Estankon; eta Arrobitxulo eta Urumea Berrikoekin, 20:00etan lokalean.
Ostegunean izango da azkeneko bilera, erdiguneko bizilagunekin, 19:00etan udaletxeko pleno aretoan hori ere.
Bilera horietan, 2019ko udal aurrekontuak aurkezteaz gain, astigartarren proposamenak eta ideiak ere jaso nahi dituzte, 2020ko aurrekontuei begira.