Palestinar herriarekiko solidaritaterako nazioarteko eguna da azaroaren 29a, eta ordurako, ahalik eta sinadura gehien biltzen saiatzen ari da The other Jerusalem proiektua, Europar Batasunean eta Nazio Batuen erakundean aurkezteko. Sinadura horiekin erakundeei eskatu nahi zaie Israelgo agintariei erantzukizunak eskatzeko eta Jerusalengo palestinarrek bizi duten bazterkeria sistemarekin bukatzeko.
Kanpainaren berri ematen ari dira Polonian, Txekiar Errepublikan, Eslovakian, Belgikan eta Espainiako Estatuan, eta astelehenean Hernanin izan zen Dalia Nassar aktibista.
«Guk sinatuko dugu»
Harrera egin zioten udaletxean Dalia Nassarri, besteak beste, Luis Intxauspe alkateak, Garazi Etxarri berdintasunerako zinegotziak eta Damian Pedrosa politika sozialetarako zinegotziak. Nassarrek okupatutako Jerusalemen bizi diren palestinarren egoeraren berri eman zien, eta «nazioarteko parte-hartzea» eskatu zuen, «erresistentziarako geratzen den aukera bakarrenetakoa» delako.
Udal ordezkariek ziurtatu zioten «norbanako bezala eta erakunde bezala ere sinatuko» dutela eskaria. Era berean, adi entzun zituzten Nassarren azalpenak, eta feminismoaren inguruan eman zuen ikuspegia, Union of Palestinian Women Committees elkarteko ordezkaria den aldetik. «Mundu arabiarraren irudi bat daukagu erreala ez dena; feminismoa Europatik haratago doa».
Eskerrak eman zituen Nassarrek. «Guztiok egin behar genuke bat, injustiziei aurre egiteko».
Master Plana, palestinarrak botatzeko
MunduBat gobernuz kanpoko erakundeak bultzatu du The Other Jerusalem proiektua, «zalantzan jartzeko israeldarren legez kanpoko okupazioa Jerusalem ekialdean, eta bateratutako Jerusalem horren irudi faltsua».
Dalia Nassarrekin batera kanpainaren berri ematen ari da Rami Saleh aktibista ere, baina Madrilen zenez, Nassarrek eman zituen datuak Hernanin.
Nazio Batuetan eta Europar Batasunean aurkeztuko den agiria sinatu daiteke ‘theotherjerusalem.org’ webgunean.
Besteak beste, gogorarazi zuen Nakba egunean, 1948an, «Palestina milizia israeldarrek okupatu zutela eta Jerusalem mendebaldean 28.000 palestinar etxeak uztera behartu» zituztela. Era berean, azaldu zuen «1967an hiri zaharreko auzo palestinar aberatsenean 950 etxe utzi behar» izan zituztela, eta «135 etxe suntsitu» zituztela. Hau guztia, «Master Planaren baitan sustatutako politiken barruan kokatzen» da: «Jerusalemen bizi diren israeldar kopurua haunditu eta palestinarrak hiritik botatzea da helburua. 2020rako Jerusalengo palestinar kopurua %40 izatetik %30 izatera jaitsi nahi da». Datu gehiago ere eman zituen, adibidez, palestinarrek etxeak eraikitzeko bizi dituzten traben inguruan, eta datu guztiak «Jerusalengo Udalekoak» direla azpimarratu zuen.
«Jerusalengo emakume palestinarren erresilientzia haunditu nahi dugu»
MunduBat erakundearekin batera elkarlanean aritzen dira erakunde palestinarretako baten kide ere bada Nassar. «Gizon eta emakumeen arteko berdintasunean biziko den gizarte zibil, demokratiko eta progresista baten alde egiten dugu, eta Jerusalengo emakume palestinarren erresilientzia haunditu nahi dugu, israeldarren okupazioaren aurrean bereziki sufritzen dutelako».
Jerusalengo errefuxiatu kanpamenduetan egiten du lan, «pertsonak daudelako han, bakoitza bere istorioekin; ez dira zenbakiak». Besteak bete, hiritartasunik ezak sortzen dituen eskubide urraketak, legez kanpoko kartzelaratzeak, umeen espetxeratzeak... izan zituen hizpide.
Autodeterminazioa helburu
Azkenik, gogorarazi zuen «1947a baino lehen 3 komunitate armonian bizi» zirela.
«Zazpi urterekin gogoratzen dut amarekin joan nintzenean Jericho auzora. Lur asko ikusita, amari galdetu nion zergatik egiten genuen borroka juduen kontra; nahikoa lur bazegoela errefuxiatu palestinarrak itzultzeko. Asko haserretu zen ama, eta esan zidan ez esateko berriro ‘judu’ hitza. Haiek israeldar sionistak zirela. Ez genuela inolako arazorik lurralde okupatutik kanpo bizi ziren juduekin». Horrela ulertu zuen Nassarrek palestinarren borroka zein zen. «Ez gara ari lur puska batengatik bakarrik; borrokan ari gara errefuxiatuek beren lurraldera itzultzeko duten eskubidearengatik, espetxeratu politikoen askatasunarengatik eta herri palestinarraren autodeterminazio eskubidearengatik».