Tira-birak izaten ari dira Astigarragan, txakurren gaiarekin, EH Bilduk azaldu duenez; eta horiei irtenbidea bilatu nahian, herritar guztiekin bildu nahi du: txakur jabeak direnekin, eta ez direnekin.
Eta horretarako, gaur eta bihar jarri du zita. Txakur jabeak ez direnekin egingo du bilera gaur, 19:00etan hasita, udaletxean. Eta bihar, berriz, txakur jabeekin bilduko da, ordu eta toki berean.
«Begi-bistakoa da, azkeneko urteotan Astigarragan familia eta etxebizitzetako bizitza estiloa aldatzen joan dela. Aldaketa horren erakusleetako bat da, familia askotan txakurren presentzia areagotu egin dela. Herrian 1.000 txakur baino gehiago daudela kalkulatzen da; sei biztanleko, txakur bat», nabarmendu du EH Bilduk.
Horregatik, uste du «beharrezkoa» dela «errealitate berri honi egoki erantzutea. Guztion arteko bizikidetza posible dela sinetsita, erronka honi heldu nahi izan diogu, bi bilera hauek antolatuta», azaldu du.
«Beharrezkoa da sormenaz eta herritarren eskaerekin, soluzioa aurkitzea»
Astigarragako EH Bilduk uste du, «alferrikakoa» dela «sinestea txakurrek sortzen dituzten egoerak isunekin soilik bideratuko direla. Isun bat bera ere jarri gabe konponduko dela esatea bezain alferrikakoa».
Eta gaineratu du: «horregatik, beharrezkoa da sormenaz eta herritarren eskaerekin, guztion arteko bizikidetza ahalik eta hobekien bermatuko duen soluzioa aurkitzea. Dagoeneko proposamen bat lantzen hasi gara, eta bi bilera hauetan aurkeztu eta eztabaidatuko dugu, hobetu edota aldatu dadin».
Zentzu horretan, EH Bilduk salatu nahi izan du «EAJren jarrera pasiboa, berriro ere ostrukarena egin baitu, arazoari ihes eginez», adierazi du. Eta azpimarratu du: «guk proposatutako txakur parke eta guneak jarri ondoren, isunak jartzea besterik ez zaio bururatu EAJri».