Aurten ere antolatu ditu Negulekuak, Xaguxar aisialdi taldeak, Gabonetako oporraldiaz gozatzeko. Aste eta erdiz elkartuko dira Herri Eskolan, abenduaren 26tik urtarrilaren 4ra bitarteko astegunetan, goizeko 10:00etatik 13:00etara. 2006 eta 2014 urteen artean jaiotako haurrentzat dira, eta izenemate epea gaur zabalduko dute, datorren asteazkenera arte.
Kultur etxean eman behar da izena, eta 40 euro dira. Hala ere, hobariak izango dira familia ugarien eta bi senideren izenemateen kasuan. Nahi duenak, gainera, zaintza zerbitzua ere izango du aukeran, 08:00etatik aurrera, 25 euro gehiagorengatik. Informazio gehiagorako, 943 33 50 64 telefonora deitu daiteke, goizetan; edo info@xaguxar.org helbide elektronikora idatzi.
Azaroaren 24an, tailerrak
Bestalde, larunbatetako ekintzak ere jarriko dituzte martxan beste urte batez, negu garaian. Hilean larunbat batez egingo dituzte tailerrak, jolasak edota eskulanak, eta azaroaren 24an izango da aurrenekoa: haur-hezitzaile tailerrak izango dira, kultur etxean, arratsaldeko 16:30etatik 18:00etara.
4-12 urte bitarteko haurrentzat izango dira larunbatetako ekintzak. Horietarako ez da izenik eman behar, eta doakoak izango dira.