Gaur jarri du zita Herri Eskolako Guraso Elkarteak, azaroko hezkuntza hitzaldiarekin. Eta oraingoan, etxeko txikienen jarrerei buruzko saioa antolatu dute: Haurren jarrerak ulertuz. Izar Arregi Aizpuru psikologo eta terapeuta izango da hizlari bi orduko saioan, arratsaldeko 18:30etan hasi eta 20:30ak arte, Astigarragako Herri Eskolako areto nagusian.
Zergatik dago horrela eta nola lagundu diezaioket?
Gurasoei zuzendutakoa da saioa, eta lagunduko die, seme-alaben egoera zein den eta zergatik ezagutzen, eta nola jokatu asmatzen: «sarritan, aurpegiarengatik antzematen dugu zein den haurraren egoera. Negarrak, kasketak...», nabarmendu dute Guraso Elkartetik. Eta galdetu dute: «baina nola jakin zergatik diren, nola jokatu egoera horien aurrean, eta nola lagundu haurrari?».
Galdera horiei erantzuna ematen saiatuko da Arregi, eta egoera horietan jokatzeko pautak emango dizkie bertaratuei. «Egoerak ulertu eta gurasoen rolaz hausnartzeko saioa izango da gaurkoa», aurreratu dute Guraso Elkartetik.