Botak alde batera utzi, eta mendiaz beste modu batera, lasai, gozatzeko aukera daukate hernaniarrek, eta bereziki, Mendiriz Mendi elkarteko kideek, atzotik. Mendizale Astea hasi baitzen atzo, haientzat.
Gaur izango da bigarren jarduera; Tamur expedition dokumentala ikusi ahal izango da, arratsaldeko 19:30etan, Biterin. Suam del Cerro gidarekin batera, Tamur ibaiaren jaitsiera kayakean bizi izango dute bertaratuek, baina beste ikuspuntu batekin: ikusleak kameraren beste aldean jarriko ditu, logistikaren berri izan dezaten.
Ostiralera arte izango dute zer gozatua; Jon Galdosen Apalatxeak dokumentala jarriko dute bihar, eta etzi, aldiz, Sonia Rodriguezen Patagonia.