Aurreko hilabetean hasi zuen ikasturtea Hernaniko Hezkuntza Plataformak, aitaren rola aztertzen, eta bigarrenerako zita dagoeneko zehaztu dute. Ostegunean izango da, arratsaldeko 17:30etan hasita, udaletxeko areto nagusian.
Sexu identitatea, aztergai
Hain zuzen, sexu identitatearen gaiak haurtzaroan duen garrantzia aztertuko dute. Eta bereziki, transexualitatearen gaia jorratuko dute.
Bereziki transexualitatearen gaia jorratuko dute.
Horretarako, hain zuzen, Nerea Sancho sexologia adituaren laguntza izango dute. Arremanitz Kooperatiban lan egiten du Sanchok, eta Hernaniko Udaleko Plax! Sexu eta bikote aholkularitzan arreta eskaintzen du.
Neska edo mutil bezala errekonozitu behar?
Hezkuntza Plataformak galdera batzuk planteatu ditu gaiaren inguruan: «haurrek, neska edo mutil bezala errekonozituak izatea behar dute? Nola dakigu transexualitate-egoera baten aurrean gaudela? Zein paper betetzen dute genero-rolek honetan guztian?».
Diotenez, «haur batek beste sexukoengan ohikoagoak diren jarrerak, jolasak edo apaindurak gustuko dituenean, hainbat kezka eta zalantza sor dakizkiguke». Eta horiei aurre egiten saiatuko dira.