Irabazi eta pixkanaka sailkapen orokorrean gora egitea da Hernaniren helburua, aurten ere, Ohorezko Mailari eustea lortzeko.
Gaurkoan irabazteak, ordea, badauka beste sari bat ere; azken 32 urtetan lortu ez duena lortuko luke Hernanik gaur Gernikari irabazita, Errege Kopako finalerdietara pasatzea, hain zuzen.
Ezin lasaitu
Modu batera edo bestera, beraz, irabazteko asmoz zelairatuko dira gaur Hernaniko mutilak, eguerdiko 12:00etan Landaren, Gernikari aurre egiteko.
Denboraldiko aurreneko euskal derbia izango den honetan, sekula baino berdinduago dauden bi aurkari ariko dira elkarren kontra. Sailkapen orokorrean azkenaurreko eta azken-bigarren postuetan daude hurrenez hurren, Gernika eta Hernani, baina 11na punturekin berdinduta. Hernanik denboraldia hobeto hasi badu ere, ezin du inolaz ere lasaitu. Polidoriren taldea ohituta dago, hala ere, dena ematera, eta gaurkoan ere ez dute hutsik egingo.