Aranzadi Zientzia Elkarteak Hernaniko eta inguruetako anfibio eta narrastiak gida-liburuaren bigarren edizioa kaleratu du, eta Kronikan eskuragarri izango da haue ere.
Iñaki Sanz-Azkue biologoak eta Egoitz Alkorta, Ingurugiro Zientzietan lizentziatuak egindako azterketa biltzen duen liburua da, Mikel Ramirez de Alda, Kronikako langileak maketatu eta diseinatua.
Informazioa, ipuin eta kondairak, eta proposamenak
2007an Hernaniko Natur Ondarea aztertzen hasi zen Iñaki, eta horrekin, anfibio eta narrastien datuak biltzen. Unibertsitateko ikastaro batean ezagututa egin zuen proiektuarekin bat Egoitzek. Eta interes pertsonal horretatik, Ziraba proiektuaren bueltan, gida-liburu honetan bildu zituzten datu horiek denak, eta herritar eta Ereñotzuko Txirrita eskolako ikasleek emandakoak.
Lehengo urtean kaleratu zuten aurreneko edizioa, eta izandako arrakasta medio, bigarren edizioa kaleratu berri da. Anfibio eta narrastien inguruko datuez gain, hainbat ipuin eta kondaira ere kontatzen dira, eta animaliatxo horiek ezagutzeko proposamen eta gomendioak ere ematen dira, publiko orokorrari zuzendutako liburuan. Bost eurotan saltzen da.