Lau jarduera antolatu ditu Hernani Errotzen taldeak azaro eta abendurako. Datorren hilaren 17an estreinatuko du ekintza-sorta Donostiako Ereski Gregoriar Scholaren emanaldiak.
Joan Manuel Larrarte, oroitzeko
Ereski abesbatzak hilaren 17an eskainiko du, beraz, emanaldia, San Joan Bataiatzailearen parrokian izango da hori, iluntzeko 20:00etan hasita. Gipuzkoako Azken mendeetako Kodize edo Kantoraletatik aukeratutako abesti sorta bat eskainiko dute, eta han justu parrokian bertan organista izan zen Joan Manuel Larrarteren obra bat ere entzun ahal izango da.
«Merezimendu guztiz eta bere musika obrak duen garrantziagatik berreskuratu nahi dugu Larrarteren oroimena», azaldu du Hernani Errotzenek ohar batean.
Eneko Bidegainek, hitzaldia
Hilaren 21ean izango da, bigarrena; hitzaldia eskainiko du Eneko Bidegain Mondragon Unibertsitateko ikus-entzunezko komunikazioko irakasle eta ikertzaileak: Lurraldea eta herria. Zazpiak bat. Atzo, gaur, bihar. Arratsaldeko 19:30etan izango da, Biterin.
Iruña-Veleiaren kasua ere izango dute hizpide. Horretarako, Joan Martin Elexpuru izango dute hizlari, Iruña-Veleiako euskarazko grafitoak liburuaren idazlea. Hilaren 29an izango da hori, arratsaldeko 19:30etan, Biterin.
Udazkeneko ekintzei bukaera emateko, Ezagutu Hernani lehiaketa egingo dute, aurten ere, abenduaren 3tik 14ra bitarte.