AZAROAREN hasierarekin batera, Kafe Tertulia egitasmoa abiaraziko du laugarrenez, Udal Euskaltegiak. Hilaren 7an, datorren asteazkenean, izango da aurreneko saioa, eta asteazkenero errepikatuko da.
Arratsaldeko 17:00etatik 18:30etara izango da euskera praktikatzeko aukera, Gunea garagardotegian. Baldintza bakarra da tabernan zerbait hartzea.
Euskera praktikatzea, helburu
Orain arte bezala, euskera modu informalean praktikatzeko aukera luzatzea izango da Kafe Tertuliaren helburu nagusia, Udal Euskaltegiak dioenez: «hiru edo lau pertsona mahai baten bueltan eseri, kafe bat-edo eskatu, eta goxo-goxo euskeraz aritzeko aukera izango da».
Irekia dela gogorarazi dute: «edonork hartu dezake parte: euskera ikasleek, euskera ikasle izandakoek, euskeraz hitz egiteko aukera edo erraztasun haundiagorik ez dutenek edota, besterik gabe, une atsegin bat pasa nahi dutenek».