Enpresarean Jardunaldia egin zuen aurreko astean Bai Euskarari elkarteak, eta bertan izan ziren Udala eta Foru Aldundiaren gisako erakundeez gain, enpresa eta profesional asko ere.
Luis Intxauspe alkatearen eta Markel Olano diputatu nagusiaren ongietorriaren ondoren, Rober Gutierrez Bai Euskarari Elkartearen zuzendariak hartu zuen hitza, eta herraminta gisa aurkeztu zuen Jardunaldia: «alor sozioekonomikoan euskeraz normaltasunez aritzeko proiektu esperimental gisa, enpresei eta profesionalei egitasmoak ezagutzera emateko bidea eskaintzen diena, solasaldirako, eztabaidatzeko eta elkarlana sustatzeko espazio bat partekatzeko aukera errazten diena, enpresen eta profesionalen interesekoak diren gaiak jorratu nahi dituena eta tresna eta bitarteko berriak lantzen eta sortzen lagundu nahi duena».
Solasaldiak, esperientziak partekatzeko
Hortik aurrera, ekonomia eta teknologia arloko profesionalek hitzaldi eta solasaldien bitartez partekatu zituzten esperientziak, euskeraz. Eraldaketaren onurez aritu zen gehiengoa, baina betiere, pertsonen ongizatea kontuan hartuta.