Argazki erakusketa jarri du Ainara Lasa Perezek Biterin, eta azaroaren 7ra arte izango da ikusteko aukera. Fotosintesia deitu dio 2013tik 2017ra bitartean egindako argazkietako batzuk aukeratuta sortutako lanari: «amaitu gabe dagoen, mugimenduan jarraitzen duen eta, aldi berean, geldiunea proposatzen duen prozesua» erakusten du bertan, sei ataletan banatutako 40 argazkirekin.
Ingurunea oinarri
Lan hau «inguruari begiratuta» sortu du Lasak. «Azkeneko urte hauetan eta bizi ditugun eta bizi gaituzten gatazkei lotuta, askotan sumatzen dudan noraez, kezka eta paralisiari erantzun bat emateko beharraren bulkadatik sortutako proposamena da».
Inguruari lotuta, «inguruan ilun eta aldagaitz ikusten dugun hori iraultzeko jarrera» hartu du Lasak lanarekin; «heztera eramango gaitu».
Horregatik deitu dio Fotosintesia: «hazkuntzarako behar duten materia organiko bihurtzen dute materia ez organikoa landareek, algek eta bakteriek, fotosintesiaren bidez».