Maiatzean hernaniarren artean egindako inkestaren inguruko iritzia plazaratu nahi izan du EAJ-PNV alderdiak. «Inkestarako hausnarketa, kontratazio eta irizpideak zehazteari lotuta, EH Bilduk aldarrikatzen duen parte hartzerik ez da izan, beste behin» jeltzaleen esanetan; «martxan zegoela jakin genuen hernaniar batzuk esan zigutelako».
«Beldurra», Hernanin
Galdera batzuetan jasotako erantzunek hausnarketa eragin diela ere azaldu du EAJk.
«‘Zein alderdi politikok konpondu ditzake arazoak ondoen?’ galderari 431k (%72) erantzun dio ‘inork ez’ edo ‘ez dakit/ez dut erantungo’. ‘Zein iritzi duzu oposiziaren inguruan?’ galderari, berriz, 274k (%46) ez du jakin edo nahi izan erantzuten. Eta publiko egin ez den ‘Zein da zure botorako asmoa?’ galderaren aurrean 353k (%59) ez du iritzirik, 117 (%19,6) abstentzioaren alde azaltzen dira, eta 236k (%39,5) ez dakite edo ez dute erantzuten. Ez al da izango Hernanin gaur egun oraindik beldurra sortzen duela zerbait positiboa erantzuteak EH Bildu ez den beste alderdi baten inguruan, edo esateak udal kudeaketa hobea egin dezaketela haiek baino, edo onartzeak, esaterako, EAJ-PNV bozkatuko dela?».
Parte-hartzeari lotuta, bestalde, EAJk «ez du ulertzen EH Bilduk nola baieztatu dezakeen parte-hartze prozesuekin asmatu duela edo ezagunak direla, bederatzi prozesuen inguruan galdetutako 598 hernaniarretatik bataz beste 231k (%38,6) ezagutzen baditu, eta haietan parte hartu badute, bakarrik, bataz beste 27,5ek (%4,6).
Denbora gehiago?
Azkenik, Udal Gobernuaren Balorazio Orokorrari dagokion atalari lotuta, EAJk «ez du ulertzen nola 200 lagunek erantzun dezaketen badakitela nola egin baina denbora gehiago behar dutela. EH Bilduk 12 urte jarraian daramazki boterean, eta 8, gehiengo absolutuarekin. Ez badute gehiago egin, ez zekitela edo nahi ez zutelako izan da».
Dena den, «hernaniarrak lasai eta animatuta» egon daitezen nahi dute jeltzaleek, eta hauteskundeetan denak bozkatzera animatu ditu.