Prentsaurrekoa eman zuten atzo alderdi sozialistaren Hernaniko egoitzan Ricardo Crespo sozialisten udaleko bozeramaileak, Maria Jesus Egido zinegotziak eta Pablo Peñacoba, Hernaniko sozialisten idazkari nagusiak, «balioa kentzeko EH Bilduren udal gobernuak egindako Udalaren kudeaketaren inguruko inkestari».
Izan ere, kritiko agertu da alderdi sozialista: «errespetu eta edukazio falta da, eta ez soilik Alderdi Sozialistarekiko, baizik eta baita ere PSE-EE bozkatzen duten hernaniarrekiko, PSE-EEri dagozkion datuak ez agertzea, alkatearen esanetan ‘adierazgarriak ez direlako’». Crespok gogorarazi zuen «18 eta 29 urte arteko gazteen artean bigarren aukera» direla, eta «2015eko udal hauteskundeetan hirugarren indarra» izan zirela, Zikuñaga, Antziola, edota Lizeagako mahai batzuetan. «Auzo horietan hirugarren indarra izatea ez da adierazgarria?». Era berean, «publikoari irekita egoitza ofiziala duen udaleko alderdi bakarra» direla ere azpimarratu zuen.
«Ezkutuko botoa»
Datuei erreparatuta, Cresporen esanetan «beldurra dago Hernanin Udalari adierazteko zein alderdi lehenesten duen», eta «ezkutuko botoa» dago: «2015eko udal hauteskundeetan PSE-EEk botoen %12 lortu bazuen, inkestaren arabera %1,6k onartu du PSE-EE bozkatu izana; hau da, botoa eman zutenen %20k. Honek erakusten du hernaniar asko dagoela EH Bilduren gobernuan konfiantzarik ez duena». Horrez gain, «alkateak ezkutatu nahi izan duen datua» azaleratu zuen: «alderdi sozialistaren aldeko botoa eman zutela onartzen duen %20 horretatik %93k berriro egingo lukeela dio».
Bestalde, gogorarazi zuen inkesta maiatzean egin izanak eragin duela «Pedro Sanchezen gobernuaren ekintzek hernaniarrengan eduki ahal izan duten eragina kontuan ez hartzea».
Azkenik, zein zerbitzu publikoren inguruan galdetu erabaki izana ere kritikatu dute sozialistek; «Bilduk ondoen baloratzen direnak aukeratu ditu». Baina sozialistek «hernaniarrentzat lan egiten» segiko dutela azpimarratu zuten, «maiatzeko hauteskundeak arte».