Hirugarren deialdia argitaratu du Udalak, kale arte sorkuntzarako diru-laguntzak banatzeko. Proposamenak hilaren 19ra arte aurkeztu daitezke, eta sorkuntza horietan teknika artistiko hauek erabili ahal izango dira: pintura, eskultura, argazkia, graffitia, mosaikoa edota collagea.
Lau tunel aukeran
Diru-laguntza hauen helburua da «arte plastikoek Hernaniko kaleetan duten presentzia areagotzea». Hainbat teknika erabili daitezke, eta gaiak libreak dira. Baina interbentzio artistikoak paretetan garatu nahi dituztenek lau izango dituzte aukeran: Portu eta Elizatxo auzoen arteko tunela, Karabeleko trenbide azpiko tunela, Etxeberri auzoko Zubiondo tunela edo Gay Mur eta Santa Barbara auzoen artekoa.
Diru-laguntzaren onuradunak kultur eremuan aritzen diren edo hasi nahi duten pertsona fisikoak edota elkarteak izan daitezke, eta Udalak 10.000 euro bideratuko ditu deialdira; proiektu bakoitzak gehienez 6.000 euro jasoko ditu.
Iker Vallek, Ave Marian
Diru-laguntza hauen bigarren deialdian Iker Valleren proiektuari eman zitzaion laguntza, eta artistak Ave Marian jarri berri du ‘Itsasoaren idatziak’ eskultura.
Aurretik, Aitor Ruiz de Eguinok eta Axpik jaso dute laguntza.