Joan den asteazkenean, gizonezko bat atxilotu zuten Hernanin, Zinkoenean bikotekideari aurpegian ukabilkada eman eta mehatxu egiteagatik. Gertatutakoa «gaitzetsi» nahi izan du Hernaniko Koordinadora Feministak: «gogor gaitzetsi eta salatu nahi dugu, herrian izandako eraso sexista. Gure elkartasun eta babes osoa adierazi nahi diogu erasotua izan zen emakumeari, baita laguntzera gerturatu zen gizonari ere», azaldu du.
Eta gaineratu du: «emakumeon kontrako indarkeriak ez du mugarik, bizi garen sistema kapitalista patriarkalaren funtzionamenduaren ezinbesteko tresna baita, eredu honek sortzen dituen pertsonen arteko botere harremanak betikotzeko tresna, alegia». Nabarmendu duenez, horren adierazle da, «erasotzaileak sentitzen duen inpunitatea emakume bat espazio publikoan eta jendaurrean erasotzeko». Adierazi du «eragile guztion ardura» dela «jendarte matxista honen aurka lan egitea, norberak bere esparrutik, bestela indarkeria matxista sostengatzen jarraituko baitugu. Nazkatuta gaudelako, beste behin ere, autodefentsa feministarako deia egiten dugu ozen, gure bizitzak direlako jokoan daudenak».