Tilosetan zita irekia jarri, eta elkartu ziren herritarrak sartu ziren irailaren 27an Urumea HerriGunean. Sare sozialen bidez egin zuten deialdia aurretik, espazio berri bat sortzeko: «helburua herrigintza sorkuntzatik eta harreman gertuetatik gozatzea izango» zela adierazi zuten. Eraikina okupatu eta asanblada irekiak egin zituzten, espazioa nola antolatu denen artean erabakitzeko, eta tailerrak antolatzeko.
Eraikina publikoa da, eta botatzekoak dira, nahiz eta HerriGuneko barne taldearen arabera, Udaletik jakinarazi dieten ez dela berehalakoan botako. ‘Hernani’ Musika Eskola Publikoko klase batzuk, adibidez, bertan ematen dira duela urte batzuetatik hona, eta baita beste zerbitzuren bat ere. Udaletik jakinarazi dute harremanetan daudela HerriGuneko kideekin. Bilera bat egin dute, eta beste bat ere egitekoak dira.
Iraila bukaeran Urumeako eraikina okupatu zenuten hainbat herritarrek. Zergatik Urumea?
Alde batetik, Urumeako eraikinak bazterretako identitateoi erdigunean kokatzeko aukera ematen digulako, ez bakarrik sinbolikoki, baizik eta baita fisikoki ere. Urumea Ikastola herriko puntu estrategikoenetariko batean dago eta argi geneukan herrigunea erdigunean egon behar zela. Bestetik, Urumea eskola izandako espazioa da, eta guretzat honek pisu sinboliko eta erromantikoa ere badu. Herritar gehienok (ez guztiak zoritxarrez) edozein eskolatik pasa garelako, eta espazio interesgarria iruditzen zitzaigun herriko jakintzen, praktiken eta sentimenduen transmisioa egiteko; alegia, denok ‘gure’ sentitzeko espazio aproposa ikusten genuen. Gainera, gehienetan, eskola, instituzioek ‘bertikalki’ kudeatutako instituzioa da; eta, zehazki, espazio honen izaera publikoa kontuan hartuta, guk, herriak ‘horizontalki’ kudeatutako ‘eskola herritarra’ sortzearen beharra ikusten genuen. Hau da, espazio edota eraikin publikoak berrartu eta hauei esanahi berriak ematearen beharra.
«Justizia soziala eta kultura herrikoia sustatzeko gauzatzen diren ekimenen guztien oinarrian dauden harremanak erdigunean jarri ditugu»
Zerk bultzatu zaituzte Herri Gunea sortzera? Zein beharrei erantzun nahi zeniekete?
Militantzia beste modu batera begiratzen hasi ginen, ikusi genuen bertan izugarrizko gabezia zegoela sorkuntza aldetik, eta gutako gehienak jende sortzailea ginela; beraz, horrelako espazio bat beharrezkoa genuela iruditu zitzaigun, gure borroka politikoak aurrera ateratzeko baina gure erara. Identitate desberdinen espazio bat sortu nahi genuen, bazterreko identitateak erdigunera ekarriz eta ‘militantzia’ plazerez biziz, molde berriak sortuz, sorkuntza ardatz izanik; horregatik espazio transfeminista eta libertarioa. Bata bestea elikatu, gauza berriak ikasi eta erakutsi, eta nola ez gaur egungo eredu heteropatriarkala, kapitalista eta koloniala zalantzan jarriz eredu berriak sortu.
Gaztetxea ere badago Hernanin. Zein da Herri Gunea eta Gaztetxearen arteko desberdintasuna? Zergatik behar dira bi espazio okupatu autogestionatu?
Argi dagoena da, lehen begirada batean, irudi lezakeela bi espazio autogestionatu oso bertsu direla. Eta, jakin, badakigu, puntu batzuetan bat egiten dugula. Baina, lan egiteko forma eta bertan ematen diren praktikei dagokionez, desberdinak dira: gurean, justizia soziala eta kultura herrikoia sustatzeko gauzatzen diren ekimen guztien oinarrian dauden harremanak erdigunean jarri ditugu, hierarkia eta botere asimetria ematen diren lehen espazio politikoak baitira.
«Identitate desberdinen espazio bat sortu nahi genuen, bazterreko identitateak erdigunera ekarriz eta ‘militantzia’ plazezer biziz, molde berriak sortuz»
Bigarren galderari eutsiz, Hernani, gune autogestionatu desberdinez betetzea, gure ametsetako bat izango litzake. Herri lurrak eta eraikin publikoak jabetza pribatura igarotzeko neurri politikoak hartzen ari diren honetan, gure ustez garrantzitsua da kontrako bideari eutsi eta espazio publiko zein pribatuak herriaren eskuetan eta herriaren mesedetarako lanean jartzea.
Herritar guztientzako irekitako espazioa izatea nahi duzue: edozein adin, genero, jatorri eta gaitasun dutenentzako. Nola hartu daiteke parte bertan?
Antolatzen diren bilera irekietan edozeinek dituen proposamenak bota ditzake, bestela korreo elektroniko (urumeaherrigunea@riseup.net) edo sare sozialen bitartez ere jarri daiteke harremanetan, ezagutzen bagaituzte ere aurrez aurre esan eta listo.
Lehendik ere badira zerbitzu publiko (Musika Eskola) eta elkarte batzuk (Irrixola guraso elkartea) eraikina erabiltzen dutenak. Nolako harremana duzue?
Sartu aurretik ere bagenekien. Batzuekin besteekin baino harreman estuagoa dugu, eta bata bestea errespetatuz, gero eta sare egonkorragoa lortu nahi dugu. Espazio handia da, beraz denontzat nahiko leku bada.
«Hernani gune autogestionatu desberdinez betetzea gure ametsetako bat izango litzateke»
Oraingoz nola antolatu da espazioa?
2. 3. eta 4. solairuak okupatu ditugu eta gela bakoitzari izaera bat eman diogu, sorkuntza arlo ezberdinetarako espazioak sortuz, hau da, mugimendu gela, ikus-entzunezko gela, musika gela, tailerra,…; baita beste era bateko gelak ere: sukaldea, goxo gela, bilera gela. Bestalde, gune politikoak emakumeen* gela, adibidez, edo zapalduen gela (Queer gela) sortzen gabiltza. Proiektu berria denez, beharren arabera egokitzen eta garatzen joango gara.
Ekintza edo ekitaldi jakin batzuk antolatu dira. Zein erantzun izan dute?
Orain arteko ekintzek erantzun ona izan dute eta badakigu hemendik aurrera herritarron parte hartzearekin proiektua elikatzen joango dela.
Etorkizunera begira besterik antolatzekotan bazarete?
Bai, espazioa txukuntzea lan handia da, hortaz gaineratu nahi genuke esker onez hartuko ditugula bigarren eskuko altzari edo behar ez dituzuen tresna eta materialak. Ekintzei dagokienez, hemendik gutxira plazaratuko dira ikastaroak eta agenda kulturala. Bestalde edonork zerbait antolatu edo espazioa erabili nahi badu jar dadila gurekin kontaktuan.
Urumea Herrigunea - Taldeak
Hiru talde berri, sortzear
Joskintzarako taldea, saski ekologikoen taldea eta okinen taldea prest dira ia.
Dagoeneko «espazio batzuk altzariz eta proiektuz bete» dituztela ere jakinarazi dute sare sozialetan, eta eskerrak eman dizkiete Añorgako Firestone lantegi berreskuratuko kideei, altzariak berritzen laguntzeagatik.
Prestatu duten geletako bat, goxo-gela izan da; beste bat, Bilgunea, edo talde motorea biltzeko gela; eta azkenik, joskintza tailerra emateko gela. Hain zuzen, joskintza ikastaroa egin ahal izango da laster, Mundo Toxiko arropa diseinu etxearekin elkarlanean. Baina, horrez gain, okintza tailerra ere ematekoak dira. Okinen taldea osatzen ari dira, horretarako. Bestalde, saski ekologikoen taldea ere osatzekotan dabiltza, Beterri 0km-rekin elkarlanean. Laster emango dute informazio gehiago.
Urumea Herrigunea - Azaroko egitaraua
Zinea eta azoka, azaroan
Bihar hasiko da Zinemaldia. Bestalde, azokarako materiala biltzen ari dira.
Gelak txukuntzeaz gain, hainbat ekintza eta tailer antolatu dituzte dagoeneko Urumea HerriGunean, eta azarorako agenda ere prestatu dute: bigarren eskuko azoka, eta Zinemaldia.
Azokarako, gai bilketa
Batetik, bigarren eskuko azoka antolatuko dute hilaren 18an. «Diru irabaziak proiektua aurrera eraman ahal izateko erabiliko» direla azaldu dute.
Azokarako materiala behar dute aurrena, ordea, eta horretarako bihar jarri dute zita, 17:00etatik 19:00etara. «Behar ez duzuna» eramateko diote.
Aurreneko pelikula, bihar
Bestalde, Zinemaldiari ere bihar emango diote hasiera; Euskal Herriko ADBak jarriko dute 19:30etan. Astelehen, astearte, ostegun eta ostiralean, berriz, 19:00etan jarriko dira, hurrenez huren, Hedwig and the angry inch, Shortbus, Ana Caótica eta Gurean, Askekintzak egindako dokumentala.
Asteazkena, berriz, umeen eguna izango da: 17:00etan Totoro bizilaguna jarriko dute.