Azaroaren 23tik abenduaren 3ra, Euskeraren Egunera, izango da Euskaraldia, 11 egunez euskeraz hitz egin eta hizkuntza ohiturak aldatzeko asmoz. Eta astigartarrek, zeresana izan nahi dute, egitasmoan. Horretarako, webgune propioa ere jarri dute martxan, Euskaraldian parte hartuko duten herritarrak bilduko dituena, hain justu: astigartarrak.eus.
Aurreko asteazkenean aurkeztu zuten webgunea, eta dagoeneko 51 dira, izena eman duten astigartarrak. Web orrian bertan dago izena emateko formularioa, eta bakoitzak aukeratu dezake, Ahobizi edo Belarriprest izan nahi duen, eta zenbat eta zein konpromiso hartu nahi dituen.
Web orriaren aurkezpenari, umorez egin zion bidea, Beatriz Egizabal klown eta antzerkilariak. Euskaraldia nolakoa izan daitekeen aurreratzen saiatu zitzaien bertaratuei, eta besteak beste, 11 egun horietan gerta daitezkeen egoerak planteatu zizkien: bi Ahobizi elkartuz gero, edo Ahobizi eta Belarriprest bana, jakingo dute nola jokatu; baina bi Belarriprest elkartuta? Parrandan imajinatu zituen Egizabalek, eta kanten bidezko solasaldia parodiatu zuen: «Kaixo!», «Kaixo! Zelan?», «Ondo, ta zu?», «Beno... Ez dakit zer pasatzen den azken aldi hontan», «Jendea hasi dela dantzatzen sarritan?», «Sarri sarri!», «Sarri sarri!», «Viva tu!». Bertaratuen barre algarek lagundu zioten, bakarrizketari.