2018ko uztako sagardoa egiten duten bitartean, etenik ez dauka sagardoaren inguruko jardunak. Asteburu honetan ere aukera izango da sektorea gertutik ezagutzeko.
Ate irekiak bihar, Petritegin
Sagardogileen Elkartearen Sagastitik Kupelera egitasmoaren barruan, ate irekiak egingo ditu bihar Petritegi sagardotegiak. Goizeko 11:00etatik 13:00etara izango da aukera sagardoa nola egiten duten ikusteko. Arratsaldez, haurrentzako ekintzak ere izango dira: 15:30etatik 17:00etara, tailerrak, eta karaokea, 17:00etatik 19:00etara.
Eta bihar bertan, bisita berezia ere egingo dute. Ondarearen Europako Jardunaldien barruan, Emakumea eta Sagardogintza bisita gidatua egingo dute, goizeko 10:30etan hasita. Otaño-Goikoetxea familia sagardotegian emakumeak izan duen garrantzia azalduko dute, hain zuzen.
Informazio gehiagorako eta izena emateko: 943 457 188.
Sagardoetxean ere,azaroaren 5etik
Ondarearen Europako Jardunaldien bigarren ekintza Sagardoetxean izango da. Azaroaren 5etik 25era bitarte, Sagardoa eta emakumea erakusketa egongo da ikusgai, goizez, 11:00etatik 13:30etara, eta arratsaldez, 16:00etatik 19:30etara.
Bertan, ezagutzera emango da «sagardogintzari lotutako ondarean emakumezkoaren papera eta sagardogintzaren transmisioan eta kontserbazioan egin duen ekarpena».
Ordura arte, Sagar Uztan atera eta Argazki Rallyan parte hartu duten argazkiak ikusi ahal izango dira asteazkenera arte. Horiekin, azkeneko sari bat dago jokoan; Sagardoaren Lurraldeko Instagramen ari dira jartzen argazkiak, eta ‘atsegin dut’ gehien daukanak lortuko du Publikoaren Saria izendatutakoa.
Sagar muztioa egitekoaukera, txikienekin
Etxeko txikienekin batera sagarra eta sagardoaren mundua ezagutzeko aukera ere izango da asteburuan, gaur eta bihar egingo den tailerrean. Sagarrari zukua atera familian! izenburupean, sagar-muztioa egiteko aukera izango dute gaztetxoek, azkeneko aldiz. Gaur bi saio egingo dira 12:00etan eta 17:00etan, eta bihar, aldiz, bakarra, 12:00etan. Elebietan egiten dira, euskeraz eta gaztelaniaz. Prezioa: helduek, 4 euro; adin txikikoek, debalde.
Aurrez erreserba egin behar da: info@sagardoarenlurraldea.eus edo 943 559 575.